armi.la | armi.la

lv

lv

ວຽກງານເຄືອຂ່າຍ

ສະມາຄົມ ARMI ຖືເອົາວຽກພົວພັນປະສານງານ ແລະ ການມີສ່ວນຮ່ວມເປັນສິ່ງສໍາຄັນ. ສະນັ້ນ, ພວກເຮົາຈຶ່ງໄດ້ເຂົ້າຮ່ວມບັນດາເຄືອຂ່າຍຕ່າງໆທັງຢູ່ພາຍໃນ ແລະ ຕ່າງປະເທດ ເພື່ອເຮັດໃຫ້ໄດ້ມີການແລກປ່ຽນຂໍ້ມູນຂ່າວສານ ແລະ ອົງຄວາມຮູ້ທີ່ຈະສາມາດນໍາມາປັບໃຊ້ໃນອົງກອນໄດ້. ເຊິ່ງພວກເຮົາໄດ້ເຄື່ອນໄຫວດັ່ງນີ້:

ອົງການຈັດຕັ້ງສັງຄົມລາວ

ຫ້ອງການປະສານງານ ອົງການຈັດຕັ້ງສັງຄົມລາວ ຫຼື Lao CSO Coordination Office (LCCO) ແມ່ນຫ້ອງການປະສານງານໃຫ້ແກ່ບັນດາອົງການຈັດຕັ້ງທາງສັງຄົມລາວທີ່ບໍ່ຫວັງຜົນກໍາໄລເນັ້ນໃສ່ການປະສານງານ, ແລກປ່ຽນຂໍ້ມູນຂ່າວສານເປັນຫຼັກລະຫວ່າງສະມາຊິກໃນທົ່ວປະເທດ, ບັນດາຄູ່ຮ່ວມພັດທະນາພາກລັດຖະບານ, ພາກພື້ນ ແລະ ສາກົນ. ສະມາຄົມ ARMI ກໍແມ່ນໜຶ່ງໃນຄະນະກໍາມະການ ຫ້ອງການປະສານງານອົງການຈັດຕັ້ງສັງຄົມລາວ (Lao CSO Coordination Committee ຫຼື LCCC) ທີ່ໄດ້ມີສ່ວນຮ່ວມເຮັດວຽກ ແລະ ປະກອບສ່ວນຢ່າງຕັ້ງໜ້າໃນທຸກວຽກງານທີ່ນອນໃນຢູ່ກົນໄກເຄືອຂ່າຍທັງໝົດ 7 ຂະແໜງການຄື: 1) ການປົກຄອງທີ່ດີ; 2) ກະສິກຳ, ປ່າໄມ້ ແລະ ພັດທະນາຊົນນະບົດ, 3) ສຶກສາທິການ ແລະ ກິລາ, 4) ສາທາລະນະສຸກ, 5) ສິ່ງແວດລ້ອມ, 6) ແຮງງານສະຫວັດດີການ, ຄວາມພິການ ແລະ ການປົກປ້ອງທາງສັງຄົມ ແລະ 7) ເສດຖະກິດ, ຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ.

ກອງປະຊຸມພາກປະຊາຊົນອາຊຽນ

ກອງປະຊຸມພາກປະຊາຊົນອາຊຽນ ASEAN Civil Society Conference (ACSC) ຫຼື ASEAN People’s Forum (APF) ແມ່ນກອງປະຊຸມປະຈໍາປີຂອງບັນດາອົງການຈັດຕັ້ງສັງຄົມ (CSOs) ຢູ່ໃນບັນດາລັດສະມາຊິກອາຊຽນ, ເຊິ່ງໄດ້ຖືກຈັດຂຶ້ນເປັນກອງປະຊຸມຂະໜານກັນກັບກອງປະຊຸມສຸດຍອດອາຊຽນຂອງຫົວໜ້າລັດຖະບານ. ເປັນເວທີແລກປ່ຽນ, ແບ່ງປັນປະສົບການ ແລະ ສົນທະນາບັນຫາຕ່າງໆທີ່ກ່ຽວຂ້ອງກັບການບັນລຸເປົ້າໝາຍສະຫະສະວັດ ເພື່ອການເຊື່ອມສານກັບການຈັດຕັ້ງປະຕິບັດບັນດາຖະແຫຼ່ງການສາກົນ ແລະ ຂໍ້ຕົກລົງການຮ່ວມມືອາຊຽນ ລະຫວ່າງ ອົງການຈັດຕັ້ງສັງຄົມ (CSOs) ໃນບັນດາປະເທດອາຊຽນ. ສະມາຄົມ ARMI ໄດ້ຮັບການຄັດເລືອກເປັນໜຶ່ງໃນຄະນະກໍາມະການຊີ້ນໍາ ຂອງ ອົງການຈັດຕັ້ງສັງຄົມລາວ ຫຼື Steering Committee ຂອງກອງປະຊຸມພາກປະຊາຊົນອາຊຽນ ຫຼື ACSC/APF ໃນການເຂົ້າຮ່ວມກອງປະຊຸມດັ່ງກ່າວ. ນອກຈາກນີ້ ຍັງໄດ້ປະກອບສ່ວນໃນການເຮັດວຽກເປັນກອງເລຂາ ເພື່ອອໍານວຍຄວາມສະດວກ ແລະ ກະກຽມໃຫ້ແກ່ຄະນະຜູ້ແທນຈາກອົງການຈັດຕັ້ງສັງຄົມລາວເຂົ້າຮ່ວມກອງປະຊຸມ ACSC/APF ໃນແຕ່ລະປີ. ໃນປີ 2023 ປະເທດອິນໂດເນເຊຍເປັນເຈົ້າພາບ (ACSC/APF) ຈັດຂຶ້ນ ທີ່ ນະຄອນຈາກາຕາ, ສະມາຄົມ ARMI ພ້ອມດ້ວຍຄະນະຜູ້ແທນຈາກອົງການຈັດຕັ້ງສັງຄົມລາວ 19 ທ່ານ ກໍໄດ້ເຂົ້າຮ່ວມຢ່າງຕັ້ງໜ້າ.

ເຄືອຂ່າຍພັນທະມິດການຮຽນຮູ້ລະບົບນິເວດກະສິກຳໃນເອເຊຍຕາເວັນອອກສ່ຽງໃຕ້

ເຄືອຂ່າຍພັນທະມິດການຮຽນຮູ້ລະບົບນິເວດກະສິກໍາໃນເອເຊຍຕາເວັນອອກສຽງໃຕ້ Argo-ecology Learning alliance in South East Asia ຫຼື ALiSEA ແມ່ນເປັນໜຶ່ງໃນແຜນງານການສະໜັບສະໜູນການປ່ຽນແປງນິເວດກະສິກໍາໃນພາກພື້ນແມ່ນໍ້າຂອງ (ACTAE), ເຊິ່ງຮ່ວມກັບອົງການ CIRAD ເປັນຜູ້ຮັບຜິດຊອບບັນດາໂຄງການທີ່ກ່ຽວກັບເຄືອຂ່າຍກະສິກໍາແບບອະນຸລັກໃນອາຊີຕາເວັນອອກສ່ຽງໃຕ້ (CANSEA). ALiSEA ມີຈຸດປະສົງຫຼັກແມ່ນເພື່ອແລກປ່ຽນປະສົບການ ແລະ ຄວາມຮູ້ກ່ຽວກັບລະບົບນິເວດກະສິກໍາ. ສະມາຄົມ ສພປ ໄດ້ເຂົ້າຮ່ວມເປັນສະມາຊິກເຄືອຂ່າຍ ALiSEA ແລະ ໄດ້ຕັ້ງໜ້າປະກອບສ່ວນເຂົ້າຮ່ວມກອງປະຊຸມ ແລກປ່ຽນໃນຫົວຂໍ້ຕ່າງໆທີ່ໄດ້ຖືກຮັບເຊີນ.

ເຄືອຂ່າຍອົງການຈັດຕັ້ງທາງສັງຄົມເພື່ອສົ່ງເສີມໂພຊະນາການລາວ

ເຄືອຂ່າຍອົງການຈັດຕັ້ງທາງສັງຄົມເພື່ອສົ່ງເສີມໂພຊະນາການລາວ Scaling Up Nutrition Civil Society Alliance in Lao PDR ຫຼື SUN CSA Laos ແມ່ນເຄືອຂ່າຍອົງການຈັດຕັ້ງທາງສັງຄົມ 60 ອົງກອນໃນ ສປປ ລາວ ທີ່ເຮັດວຽກເພື່ອສະໜັບສະໜູນຄວາມພະຍາຍາມຂອງລັດຖະບານໃນສົ່ງເສີມວຽກງານດ້ານໂພຊະນາການ, ປັບປຸງສະຖານະພາບດ້ານໂພຊະນາການຂອງປະຊາຊົນໃນ ສປປ ລາວ ໂດຍສະເພາະແມ່ຍິງ ແລະ ເດັກນ້ອຍໃນໄລຍະ 1000 ວັນທໍາອິດ. ສະມາຄົມ ສພປ ໄດ້ເຂົ້າຮ່ວມເປັນສະມາຊິກໃນປີ 2017, ຫຼັງຈາກທີ່ໄດ້ເປັນສະມາຊິກຂອງ SUN CSA Laos ແລ້ວ, ພວກເຮົາກ່ໍໄດ້ຕັ້ງໜ້າເຂົ້າຮ່ວມປະຊຸມ, ແລກປ່ຽນ-ຮຽນຮູ້ ແລະ ນໍາເອົາບົດຮຽນຕ່າງໆມາໝູນໃຊ້-ປັບໃຊ້ໃນວຽກງານດ້ານໂພຊະນາການຂອງສະມາຄົມ. ພິເສດໄປກວ່ານັ້ນ ສພປ ຍັງເປັນໜຶ່ງໃນຄະນະປະສານງານຂັ້ນແຂວງໃນວຽກງານດ້ານໂພຊະນາການ (ແຂວງສະຫວັນນະເຂດ) ແລະ ເປັນໜຶ່ງໃນຄະນະກໍາມະການບໍລິຫານງານຂອງເຄືອຂ່າຍ SUN CSA Laos ໃນປີ 2022 ອີກດ້ວຍ.

ອົງການຈັດຕັ້ງສັງຄົມລາວ ໃນການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້

ອົງການຈັດຕັ້ງສັງຄົມລາວ ໃນການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ (ອລກປ) ມີຊື່ເປັນພາສາອັງກິດແມ່ນ Lao Civil Society Organization Forestry Law Enforcement Governance and Trade ຫຼື Lao CSO FLEGT: ແມ່ນກຸ່ມອົງການຈັດຕັ້ງສັງຄົມລາວທີ່ໄດ້ປະກອບສ່ວນເຂົ້າໃນຂະບວນການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈກັບສະຫະພາບເອີຮົບ (VPA). ເປົ້າໝາຍຂອງ CSO FLEGT ແມ່ນເພື່ອເຂົ້າຮ່ວມ ແລະ ປະກອບສ່ວນຢ່າງມີປະສິດຜົນເຂົ້າໃນຂະບວນການຂອງ VPA/FLEGT ລະຫວ່າງລັດຖະບານລາວ ແລະ ເອີຣົບ, ການຮັບປະກັນວ່າບັນດາຊຸມຊົນທີ່ອາໄສປ່າໄມ້ສາມາດເຂົ້າເຖິງ, ນໍາໃຊ້, ຄຸ້ມຄອງ, ປົກປ້ອງ ແລະ ພັດທະນາປ່າໄມ້ໃນຮູບແບບທາງທີ່ເປັນທໍາ ແລະ ຍືນຍົງ. ໂດຍອີງຕາມໜັງສືຮັບຮອງຈາກກົດໝາຍປ່າໄມ້ ສະບັບເລກທີ 1278/ກກປມ, ລົງວັນທີ 23 ກັນຍາ 2015. ສະມາຄົມ ເຊິ່ງສະມາຄົມ ARMI ໄດ້ເຂົ້າຮ່ວມເປັນສະມາຊິກເຄືອຂ່າຍ CSO FLEGT ລາວ ນັບແຕ່ປີ 2015 ເປັນຕົ້ນມາ, ພິເສດໄປກວ່ານີ້ໃນ, ທີ່ສຳຄັນ ປີ 2019 ໄດ້ກໍ່ໄດ້ຮັບການຄັດເລືອກຕັ້ງໃຫ້ເປັນໜຶ່ງ 1 ໃນຄະນະກໍາມະການຊີ້ນໍາຂອງເຄືອຂ່າຍອີກດ້ວຍ. ໂດຍທີ່ຜ່ານມາພວກເຮົາໄດ້ເຂົ້າຮ່ວມບັນດາກິດຈະກຳ ແລະ ກອງປະຊຸມຂອງເຄືອຂ່າຍຢ່າງສະໝໍ່າສະເໝີ; ປະກອບສ່ວນເຂົ້າໃນວຽກງານ FLEGT-VPA ແລະ ເຂົ້າຮ່ວມຂະບວນການຄົນຄວ້າບັນດາຮ່າງນິຍາມໄມ້ທີ່ຖືກຕ້ອງຕາມກົດໝາຍ (TLDs); ປະກອບສ່ວນໃນກອງປະຊຸມວິຊາການປ່າໄມ້ (technical working group) ທີ່ກ່ຽວຂ້ອງກັບປ່າໄມ້ຊຸມຊົນ ຫຼື ປ່າໄມ້ບ້ານ; ໄດ້; ອອກແບບ ແລະ ຜະລິດບັນດາສື່ສິ່ງພິມ ແລະ ສື່ໂຄສະນາຂອງເຄືອຂ່າຍເຊັ່ນວ່າ: (ແຜ່ນພັບ, ໂປສເຕີ້, ເວັບໄຊ໌), ຄຸ້ມຄອງ ແລະ ບໍລິຫານບັນດາສື່ສັງຄົມອອນລາຍ (Facebook ແລະ YouTube), ອອກແບບ ແລະ ສ້າງຖານຂໍ້ມູນອອນລາຍເພື່ອເກັບມ້ຽນບັນດາເອກະສານຕ່າງໆຂອງເຄືອຂ່າຍ (Online Database).