ໂຄງການທີ່ສຳເລັດ

ໂຄງການທີ່ສຳເລັດ

ໂຄງການຂະຫຍາຍໂຄງລ່າງນໍ້າສະອາດ ແລະ ໂພຊະນາການ

ໂຄງການເພື່ອຜ່ອນຜັນ, ຕອບໂຕ້, ປ້ອງກັນ ແລະ ຄວບຄຸມການແຜ່ລະບາດຂອງພະຍາດ COVID-19

ໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົນ

ໂຄງການສ້າງຄວາມເຂັ້ມແຂງໃຫ້ອົງການຈັດຕັ້ງສັງຄົມ ແລະ ຊຸມຊົນເປົ້າໝາຍໃນການເຂົ້າເຖິງສິດທິການຄຸ້ມຄອງປ່າໄມ້ ແລະ ການຄ້າໄມ້ທີ່ຖືກຕ້ອງຕາມກົດໝາຍຢູ່ ສປປ ລາວ

ຢູ່ 12 ໂຮງຮຽນປະຖົມ ເມືອງອາດສະພອນ, ແຂວງສະຫວັນນະເຂດ

ທີ່ເມືອງອາດສະພອນ, ເມືອງເຊໂປນ ແລະ ເມືອງນອງ ແຂວງສະຫວັນນະເຂດ

ຢູ່ 10 ບ້ານ ເມືອງຈອມເພັດ, 10 ບ້ານ ເມືອງປາກອູ, 10 ບ້ານ ເມືອງຊຽງເງິນ ແຂວງຫຼວງພະບາງ

ຢູ່ 18 ບ້ານ ທີ່ແຂວງສະຫວັນນະເຂດ ແລະ 25 ບ້ານ ທີ່ແຂວງຫົວພັນ

ຢູ່ 7 ບ້ານ 4 ເມືອງ ໃນ 3 ແຂວງ: ແຂວງບໍ່ແກ້ວ, ແຂວງໄຊຍະບູລີ ແລະ ແຂວງສະຫວັນນະເຂດ

3

4

5

6 ໂຄງການທົດລອງການພັດທະນາຄົນພິການແບບມີສ່ວນຮ່ວມຂອງຊຸມຊົນ

ທີ່ 16 ບ້ານ ເມືອງໄຊພູທອງ ແຂວງສະຫວັນນະເຂດ

ໂຄງການສະໜັບສະໜູນການເຂົ້າເຖິງວັກຊີນ, ປ້ອງກັນພະຍາດໂຄວິດ-19 ຢູ່ໃນ ສປປ ລາວ

10 ບ້ານ ເມືອງທ່າປາງທອງ, 10 ບ້ານ ເມືອງອາດສະພອນ, 10 ບ້ານ ເມືອງນອງ, 10 ບ້ານ ເມືອງໄຊພູທອງ ແຂວງສະຫວັນນະເຂດ

7

8 ໂຄງການພັດທະນາຊຸມຊົນແບບມີສ່ວນຮ່ວມເພື່ອປັບປຸງຊີວິດການເປັນຢູ່ ແລະ ສົ່ງເສີມໂພຊະນາການຢູ່ເຂດຊົນນະບົດ

14 ບ້ານ ເມືອງອາດສະພອນ, 11 ບ້ານ ເມືອງທ່າປາງທອງ ແຂວງສະຫວັນນະເຂດ ແລະ 5 ບ້ານ ເມືອງດາກຈຶງ ແຂວງເຊກອງ

9 ແຜນງານ ສົ່ງເສີມການສ້າງຕັ້ງເຂດສະຫງວນ ແລະ ການນໍາໃຊ້ຊັບພະຍາກອນທໍາມະຊາດແບບຍືນຍົງ

5 ບ້ານ ເມືອງດາກຈຶງ ແຂວງເຊກອງ

10 ໂຄງການສົ່ງເສີມການເຂົ້າເຖິງການສຶກສາຂັ້ນພື້ນຖານໃຫ້ແກ່ເດັກນ້ອຍຜູ້ດ້ອຍໂອກາດໃນຊັ້ນປະຖົມ

ໂຮງຮຽນປະຖົມ 5 ແຫ່ງ ຢູ່ ເມືອງໂພນໄຊ ແຂວງສະຫວັນນະເຂດ

ໂຄງການພັດທະນາໂຮງຮຽນບ້ານເຮົາ

ໂຄງການພັດທະນາໂຮງຮຽນບ້ານເຮົາແມ່ນໜຶ່ງໃນໂຄງການຂອງສະມາຄົມເພື່ອການສະໜັບສະໜູນ ແລະ ປັບປຸງຊົນນະບົດ (ສພປ) ທີ່ໄດ້ຈັດຕັ້ງປະຕິບັດຢູ່ 12 ໂຮງຮຽນເປົ້າໝາຍຄື: ໂຮງຮຽນປະຖົມສົມບູນດົງຂວາງ, ໂຮງຮຽນປະຖົມສົມບູນກາງຕີ້ວ, ໂຮງຮຽນປະຖົມສົມບູນຕັບເຕົ່າ, ໂຮງຮຽນປະຖົມສົມກາງບອນ, ໂຮງຮຽນປະຖົມສົມບູນຄັນຕະກຽນ, ໂຮງຮຽນມູນລະປະຖົມບັງແບດ, ໂຮງຮຽນປະຖົມສົມບູນຄຳພູ, ໂຮງຮຽນປະຖົມສົມບູນບ້ານທົ່ງ, ໂຮງຮຽນປະຖົມສົມບູນຮ່ອງເໝືອງ, ໂຮງຮຽນປະຖົມສົມບູນຕາດຂາແດງ, ໂຮງຮຽນປະຖົມສົມບູນພະນອມພອນ ແລະ ໂຮງຮຽນປະຖົມສົມບູນຜັກກະດາ. ທີ່ເມືອງອາດສະພອນ, ແຂວງສະຫວັນນະເຂດ. ໂຄງການດັ່ງກ່າວໄດ້ຮັບທຶນຈາກ ອົງການ ຄໍໂອເປີເຣດ ປະເທດສະວິດເຊີແລນ, ມູນຄ່າ 120.720 ໂດລາສະຫະລັດ, ເຊິ່ງມີໄລຍະການຈັດຕັ້ງປະຕິບັດໂຄງການ ເລີ່ມຕັ້ງແຕ່ວັນທີ 25 ມິຖຸນາ 2020 – 31 ມີນາ 2022, ໂດຍໄດ້ມີການຮ່ວມມືກັບກະຊວງສຶກສາທິການ ແລະ ກິລາ, ຕາງໜ້າໂດຍ ພະແນກສຶກສາທິການ ແລະ ກິລາ ແຂວງ ສະຫັວນນະເຂດ.

ໂຄງການພັດທະນາໂຮງຮຽນບ້ານເຮົາເປັນໂຄງການໜື່ງທີ່ສະໜັບສະໜູນ ແລະ ປະກອບສ່ວນເຂົ້າໃນການປະຕິບັດເປົ້າໝາຍການພັດທະນາແບບຍືນຍົງ SDG 4 ກໍ່ຄື: ຮັບປະກັນການສຶກສາທີ່ມີຄຸນະພາບເທົ່າທຽມ ແລະ ຢ່າງທົ່ວເຖິງ ແລະ ສົ່ງເສີມກາລະໂອກາດໃນການຮຽນຮູ້ຕະຫຼອດຊີວິດສຳລັບໝົດທຸກຄົນ ແລະ ກໍ່ເປັນການປະກອບສ່ວນເຂົ້າໃນແຜນພັດທະນາເສດຖະກິດ ສັງຄົມແຫ່ງຊາດ 5 ປີ ຄັັ້ງທີ 9IX ເຊິ່ງນອນຢູ່ໃນເປົ້າໝາຍທີ 2 ກໍ່ຄື ແຜນວຽກຈຸດສຸມທີ 2 ເພື່ອປັບປຸງຄຸນະພາບການສືກສາໃນທຸກລະດັບໃຫ້ສູງຂື້ນ ພ້ອມທັງສ້າງເງື່ອນໄຂການເຂົ້າເຖິງການສືກສາເພື່ອໃຫ້ມີຄວາມພ້ອມໃນການເຊື່ອມໂຍງກັບພາກພື້ນ ແລະ ສາກົນທັງເປັນການຮອງຮັບອຸດສາຫະກຳ 4.0.

ອີງຕາມການເກັບຂໍ້ມູນເບື້ອງຕົ້ນກ່ອນການຈັດຕັ້ງປະຕິບັດໂຄງການເຫັນວ່າ ໂຮງຮຽນໃນເຂດບ້ານເປົ້າໝາຍຂອງໂຄງການຍັງມີຫຼາຍຢ່າງບໍ່ທັນພຽງພໍເຊັ່ນ: ອຸປະກອນການຮຽນ-ການສອນ, ຫ້ອງຮຽນ, ຄູຍັງບໍ່ໄດ້ຮັບການຝຶກອົບຮົມທັກສະການສອນແບບໃໝ່, ຄອບຄົວທຸກຍາກບໍ່ມີເງິນທີ່ຈະຊື້ເຄື່ອງນຸ່ງ ແລະ ອຸປະກອນຮັບໃຊ້ການຮຽນຕະຫຼອດຮອດການບໍ່ໃຫ້ຄວາມສຳຄັນຕໍ່ການສຶກສາຂອງລູກ. ການປະຕິບັດບົດບາດໜ້າທີ່ຂອງຄະນະພັດທະນາການສຶກສາຂັ້ນບ້ານລວມທັງການສົ່ງເສີມການສຶກສາຂອງພໍ່ແມ່ນັກຮຽນຍັງບໍ່ທັນເຮັດໄດ້ດີ. ສະນັ້ນ, ເພື່ອເປັນການເສີມສ້າງຂີດຄວາມສາມາດ, ສະໜັບສະໜູນສົ່ງເສີມ ແລະ ແກ້ໄຂບັນຫາດັ່ງກ່າວຂ້າງເທິງ ໂຄງການພັດທະນາໂຮງຮຽນບ້ານເຮົາ ຈື່ງເກີດຂື້ນ. ເຊິ່ງມີຜູ້ໄດ້ຮັບຜົນປະໂຫຍດທາງກົງແມ່ນນັກຮຽນ 622 ຄົນ ແລະ ທາງອ້ອມແມ່ນຄູ, ພໍ່ແມ່ນັກຮຽນ, ຄະນະກຳມະການພັດທະນາການສຶກສາຂັ້ນບ້ານ ແລະ ອຳນາດການປົກຄອງບ້ານ ປະມານ 1,000 ຄົນ. ໂຄງການມີຄາດຄະເນຜົນຮັບຄື:

ອັດຕາການປະລະ ແລະ ການຄ້າງຫ້ອງຮຽນຂອງນັກຮຽນຢູ່ໂຮງຮຽນເປົ້າໝາຍບໍ່ເກີນ 5%.
ຢ່າງໜ້ອຍ 80% ຂອງຄູສອນຢູ່ໂຮງຮຽນເປົ້້າໝາຍນໍາໃຊ້ເຕັກນິກທີ່ໄດ້ຮັບຝຶກອົບຮົມຈາກໂຄງການ (ຄູ 38 ຄົນ).
ຢ່າງໜ້ອຍ 50% ຄະນະພັດທະນາການສືກສາຂັ້ນບ້ານຂອງໂຮງຮຽນເປົ້າໝາຍ ລິເລີ່ມການບໍາລຸງຮັກສາ ແລະ ສ້ອມແປງໂຮງຮຽນໂດຍການສະໜັບສະໜູບຈາກຊາວບ້ານ.

ຂໍ້ມູນກ່ຽວກັບ ໂຄງການພັດທະນາໂຮງຮຽນບ້ານເຮົາ

1) ການປັບປຸງສິ່ງອຳນວຍຄວາມສະດວກໃນໂຮງຮຽນ

ປັບປຸງ ແລະ ສ້ອມແປງອາຄານໂຮງຮຽນ ແລະ ໂຕະຕັ່ງ
ປັບປຸງບໍລິເວນໂຮງຮຽນ
ຫ້ອງອ່ານ (ມຸມສຳລັບອ່ານໜັງສື)
ສະໜັບສະໜູນອຸປະກອນການຮຽນສຳລັບນັກຮຽນ
ສະໜັບສະໜູນອຸປະກອນ ແລະ ສື່ການຮຽນການສອນ

2) ການສະໜັບສະໜູນການຮຽນການສອນ

ຝຶກອົບຮົມຄູຊັ້ນປະຖົມສຶກສາ
ການສະໜັບສະໜູນລາງວັນດີເດັ່ນສຳລັບໂຮງຮຽນ, ຄູດີເດັ່ນປະຈຳປີ ແລະ ຄູອາສາ
ສະເຫຼີມສະຫຼອງວັນເດັກສາກົນ
ການປ່ຽນເເປງພຶດຕິກໍາ ແລະ ຝຶກທັກສະຊິວິດ

3) ການສ້າງຂີດຄວາມສາມາດທາງດ້ານການສຶກສາໃຫ້ເເກ່ຊຸມຊົນ

ການສ້າງຄວາມເຂັ້ມແຂງໃຫ້ ຄະນະພັດທະນາການສຶກສາຂັ້ນບ້ານ
ກອງປະຊຸມຄະນະກໍາມະການໂຮງຮຽນ
ກອງປະຊຸມພໍ່ແມ່ນັກຮຽນ

ໂຄງການພັດທະນາໂຮງຮຽນບ້ານເຮົາ ມີ 3 ກິດຈະກຳຫຼັກ ແລະ 12 ກິດຈະກຳຍ່ອຍ

ການປັບປຸງສິ່ງອຳນວຍຄວາມສະດວກໃນໂຮງຮຽນ

ເນື່ອງຈາກວ່າ ໂຮງຮຽນເປົ້າໝາຍ ຍັງບໍ່ທັນມີສິ່ງອຳນວຍຄວາມສະດວກຫຼາຍຢ່າງ ທີ່ຈະດຶງດູດຄວາມສົນໃຈເຮັດໃຫ້ນັກຮຽນບໍ່ຢາກມາໂຮງຮຽນ ເປັນຕົ້ນແມ່ນ: ອຸປະກອນການຮຽນ-ການສອນ, ສະຖານທີ່ອາຄານຊຸດໂຊມ, ໂຕະຕັ່ງເປ່ເພ, ຫ້ອງນ້ຳບໍ່ພຽງພໍ, ບາງໂຮງຮຽນບໍ່ມີເດີ່ນເພື່ອໃຫ້ເດັກນ້ອຍເຮັດກິດຈະກຳ, ຍັງບໍ່ມີຫ້ອງອ່ານ ແລະ ຕຳລາຮຽນຍັງບໍ່ພຽງພໍ. ເພື່ອເປັນການປະກອບສ່ວນ ແລະ ແກ້ໄຂບັນຫາດັ່ງກ່າວ ຈື່ງມີກິດຈະກຳດັ່ງນີ້:

ປັບປຸງ ແລະ ສ້ອມແປງອາຄານໂຮງຮຽນ ແລະ ໂຕະຕັ່ງ

ປັບປຸງບໍລິເວນໂຮງຮຽນ

ຫ້ອງອ່ານ (ມຸມສຳລັບອ່ານໜັງສື)

ກິດຈະກຳນີ້ໄດ້ຈັດຕັ້ງປະຕິບັດຮ່ວມກັບຄູ່ຮ່ວມງານກໍຄື: ຄູ-ນັກສຶກສາ ຈາກວິທະຍາໄລເຕັກນິກ - ວິຊາຊີບແຂວງ ສະຫວັນນະເຂດ ແລະ ພໍ່ແມ່ນັກຮຽນເຂົ້າມາມີສ່ວນຮ່ວມ ເຊັ່ນ: ການທາສີປ້າຍໂຮງຮຽນພ້ອມເເຕ້ມຕົວໜັງສື, ສ້າງຮົ້ວໜາມໝາກຈັບອ້ອມໂຮງຮຽນ, ກໍ່ສ້າງຕີນຫຼັກເສົາທຸງ, ກະດານຫໍຂ່າວ, ຕູ້ໃສ່ປື້ມ, ກໍ່ສ້າງຫ້ອງນ້ຳໃໝ່, ສ້າງຫ້ອງຮຽນໄມ້ເພີ່ມ, ສະໜອງກະດານດໍາໃໝ່, ມ້າງໂຮງຮຽນຫຼັງເກົ່າ ເເລະ ຍ້າຍປຸກສ້າງໂຮງຮຽນໄມ້ຫຼັງໃໝ່ໂດຍນໍາໃຊ້ໄມ້ເກົ່າ ເເລະ ໄມ້ໃໝ່ຈາກການປະກອບສ່ວນຂອງບ້ານ ແລະ ເຈາະນຳ້ບາດານ.

ກິດຈະກຳການປັບປຸງບໍລິເວນໂຮງຮຽນ ພວກເຮົາໄດ້ຮ່ວມກັບພໍ່ແມ່ປະຊາຊົນ, ນັກຮຽນ, ຄະນະພັດທະນາການສຶກສາຂັ້ນບ້ານ, ວິທະຍາໄລເຕັກນິກວິຊາຊີບ, ຊ່າງປະຈໍາບ້ານ ຈັດຕັ້ງປະຕິບັດກິດຈະກຳປັບປຸງບໍລິເວນໂຮງຮຽນ ເປັນຕົ້ນແມ່ນ: ເຮັດເຄື່ອງຫຼິ້ນ, ຂະບວນການສ້າງເຄື່ອງໂອ່ນຊາ, ເດື່ອງດ່າງ ເເລະ ຢາງຕີນລົດ.

ພວກເຮົາໄດ້ຈັດຕັ້ງປະຕິບັດກິດຈະກຳນີ້ໃນ 10 ໂຮງຮຽນ ເຊິ່ງໄດ້ສະໜັບສະໜູນ ຖັງຢາງເກັບມ້ຽນປຶ້ມ, ປຶ້ມນິທານ 449 ເລື່ອງ, ເລື່ອງລະ 2 ຫົວ ລວມທັງໝົດເເມ່ນ 1,298 ຫົວ, ສະໜອງນິທານເຈ້ຍ, ປື້ມນິທານກາບກອນທີ່ທາງວິຊາການເມືອງ ເເລະ ວິຊາການໂຄງການໄດ້ຜະລິດເອງເເບບງ່າຍດາຍສະບັບກັອບປີ້ໃສ່ເຈ້ຍເເຂງ 7 ເລື່ອງໃຫ້ເເກ່ຄູສອນທັງໝົດ 38 ທ່ານ ເພື່ອນໍາໃຊ້ເຂົ້າໃນການຈັດກິດຈະກຳການເລົ່ານິທານ ໃຫ້ເເກ່ນັກຮຽນກ່ອນການຮຽນ.

ສະໜັບສະໜູນອຸປະກອນການຮຽນສຳລັບນັກຮຽນ

ສະໜັບສະໜູນອຸປະກອນ ແລະ ສື່ການຮຽນການສອນ

ພວກເຮົາໄດ້ສະໜັບສະໜູນອຸປະກອນການຮຽນໃຫ້ກັບນ້ອງໆນັກຮຽນ ຈຳນວນ 1,490 ຄົນ (ຍິງ 787 ຄົນ) ໃນ 12 ໂຮງຮຽນ. ໃນນັ້ນ, ມີນັກຮຽນທີ່ຢູ່ໃນຄອບຄົວທຸກຍາກ 306 ຄົນ. ການສະໜັບສະໜູນອຸປະກອນນັກຮຽນປະກອບມີ: ຖົງປຶ້ມ, ປຶ້ມຂຽນ, ບິກ ເເລະ ສໍດຳ.

ພວກເຮົາໄດ້ສະໜັບສະໜູນອຸປະກອນ ແລະ ສື່ການຮຽນ-ການສອນເຊິ່ງປະກອບມີ: ບັນທັດໄມ້ (ຍາວ, ສາມແຈສາກ, ສາມແຈທ່ຽງ ແລະ ມູມ), ລູກຄິດ, ບັດຕົວອັກສອນພາສາລາວ, ບັດໂຕອັກສອນພາສາອັງກິດ, ບັດສະຫຼະ, ບັດໂຕເລກ, ບັດຮູບຊື່ຂອງສັດ, ບັດຮູບຊື່ອາຊີບ, ບັດຮູບຊື່ໝາກໄມ້, ໂພສເຕີ້ແມ່ສະກົດໃນພາສາລາວ, ໂພສເຕີ້ຄຳສັບຮ່າງກາຍ (ລາວ/ອັງກິດ), ໂພສເຕີ້ ບັ້ງສູດ, ໂພສເຕີ້ສະຫຼະໃນພາສາລາວ, ແຜນທີ່ປະເທດລາວ, ແຜນທີ່ໂລກ ເເລະ ໜ່ວຍໂລກຈໍາລອງ. ເຊິ່ງຜູ້ທີ່ໄດ້ຮັບຜົນປະໂຫຍດໂດຍກົງເເມ່ນ ຄູ 38 ທ່ານ ເເລະ ນັກຮຽນທັງໝົດ 609 ຄົນ.

ການສະໜັບສະໜູນການຮຽນການສອນ

ເນື່ອງຈາກວ່າບາງໂຮງຮຽນເປົ້າໝາຍຄູສອນບໍ່ພຽງພໍ, ໂຮງຮຽນຫ່າງໄກຈາກບ້ານຄູສອນ ແລະ ຫົນທາງກໍ່ມີຄວາມຫຍຸ້ງຍາກ, ບໍ່ມີບ່ອນພັກເຊົາໃຫ້ກັບຄູ ເຊິ່ງເປັນສາເຫດໜື່ງເຮັດໃຫ້ມາສອນນັກຮຽນບໍ່ປົກກະຕິ, ມື້ມາມື້ບໍ່ ແລະ ເຮັດໃຫ້ການຮຽນຂອງນັກຮຽນບໍ່ມີຄວາມຕໍ່ເນື່ອງ. ອີກຢ່າງໜື່ງຄູຍັງບໍ່ໄດ້ຮັບການຝຶກອົບຮົມທັກສະການສອນແບບໃໝ່ຈື່ງເປັນສາເຫດຫຼັກເຮັດໃຫ້ນັກຮຽນບໍ່ມີຄວາມສົນໃຈ ແລະ ບໍ່ມາໂຮງຮຽນ. ດັ່ງນັ້ນ, ເພ່ືອເປັນການສ້າງຄວາມອາດສາມາດ ແລະ ສ້າງຄວາມເຂັ້ມແຂງໃຫ້ຄູ ແລະ ນັກຮຽນ ເພື່ອໃຫ້ການສຶກສາມີຄຸນະພາບທີ່ສູງຂື້ນ ຈື່ງໄດ້ມີການຈັດຕັ້ງປະຕິບັດກິດຈະກຳດັ່ງນີ້:

ສະມາຄົມພັດທະນາທັກສະຊີວິດເຊິ່ງເປັນໜື່ງໃນຜູ້ມີສ່ວນຮ່ວມໃນໂຄງການນີ້ ໄດ້ຈັດຝຶກອົບຮົມໃຫ້ກັບວິຊາການ ຈາກພະເເນກສຶກສາທິການ ເເລະ ກິລາເເຂວງ, ວິຊາການ ຈາກຫ້ອງການສຶກສາທິການ ເເລະ ກິລາເມືອງ ເເລະ ວິຊາການໂຄງການ ຈໍານວນທັງໝົດ 7 ຫົວຂໍ້ຄື: 1) ການຈັດການຮຽນ-ການສອນແບບເອົາເດັກເປັນໃຈກາງ, 2) ທັກສະການນຳພາກິດຈະກຳ ແລະ ດຶງດູດຄວາມສົນໃຈຂອງເດັກ (ເກມ, ເພັງ, ລະຄອນ, ນິທານ...), 3) ການຜະລິດ ສື່ການຮຽນ ການສອນ ໂດຍການນຳໃຊ້ວັດຖຸວັດທະນະທຳທ້ອງຖິ່ນ. 4) ທັກສະການສອນພາສາລາວ-ຄະນິດສາດ. 5) ການຈັດການຮຽນ-ການສອນຫ້ອງຄວບ. 6) ເຕັກນິກການເລົ່ານິທານ ແລະ ວຽກສົ່ງເສີມການອ່ານໃນໂຮງຮຽນ. 7) ສິດທິເດັກ ແລະ ການປົກປ້ອງເດັກໃນໂຮງຮຽນ ແລະ ຊຸມຊົນ.

ຝຶກອົບບຮົມຄູຊັ້ນປະຖົມສຶກສາ

ການສະໜັບສະໜູນລາງວັນດີເດັ່ນສຳລັບໂຮງຮຽນ, ຄູດີເດັ່ນປະຈຳປີ ແລະ ຄູອາສາ

ເພື່ອເປັນການກະຕຸກຊຸກຍູ້-ສົ່ງເສີມ ແລະ ເປັນກຳລັງໃຈໃຫ້ກັບບັນດາໂຮງຮຽນ, ຄູ, ຄູອາສາ ຜູ້ທີ່ມີຄວາມເອົາໃຈໃສ່, ຕັ້ງໃຈ ແລະ ມີຜົນງານໂດດເດັ່ນໃນການປະຕິບັດບົດບາດໜ້າທີ່ຂອງຕົນ. ສະນັ້ນ, ພວກເຮົາຈື່ງໄດ້ມີການຄັດເລືອກບັນດາໂຮງຮຽນ, ຄູ, ຄູອາສາດັ່ງກ່າວ ເພື່ອມອບລາງວັນໂຮງຮຽນດີເດັ່ນໃຫ້ໃນບັນດາໂຮງຮຽນເປົ້າໝາຍທັງ 12 ແຫ່ງ. ຜ່ານການປະເມີນໃນແຕ່ລະປີແມ່ນ ສາມາດຄັດເລືອກໄດ້ໂຮງຮຽນດີເດັ່ນ 5 ແຫ່ງຕໍ່ປີ ແລະ ຄັດເລືອກຄູດີເດັ່ນໄດ້ 7 ຄົນຕໍ່ປີ. ກິດຈະກຳນີ້ກໍເພື່ອກະຕຸກຊຸກຍູ້ຊຸມຊົນ ແລະ ຄູຜູ້ທີ່ມີຜົນງານໃຫ້ປະຕິບັດບົດບາດໜ້າທີ່ຂອງຕົນໄດ້ດີ ແລະ ສືບຕໍ່ໃຫ້ດີຂື້ນໄປເລື່ອຍໆໂດຍສະເພາະການສອນທີ່ມີປະສິດທິິພາບ ແລະ ປະສິດທິຜົນ.

ສະເຫຼີມສະຫຼອງວັນເດັກສາກົນ

ການຈັດງານສະເຫຼີມສະຫຼອງວັນເດັກສາກົນໄດ້ຈັດຂື້ນໃນແຕ່ລະປີຄື: ປີທີ1 ໄດ້ຈັດຂື້ນໃນ 5 ໂຮງຮຽນເປົ້າໝາຍ, ປີທີ2 ໄດ້ຈັດຂື້ນໃນ 12 ໂຮງຮຽນເປົ້າໝາຍ. ເຊິ່ງກິດຈະກຳທີ່ໄດ້ຈັດຕັ້ງປະຕິບັດກໍ່ຄື: ການປູກຕົ້ນໄມ້ (ຕົ້ນໄມ້ກິນໝາກ ເເລະ ຕົ້ນໄມ້ໃຫ້ຮົ່ມ), ໄດ້ມີການສາທິດການປູກ, ການປົກປັກຮັກສາໃຫ້ເເກ່ນ້ອງນັກຮຽນ. ພາຍຫຼັງປູກສໍາເລັດເເມ່ນໄດ້ມີກິດຈະກຳຫຼິ້ນເກມເຊັ່ນ: ເກມອົມນໍ້າໃສ່ເເກ້ວ, ເກມຕີກັອບຊາວບ້ານ, ເກມຢຽບໝາກປູ້ງ... ດ້ວຍບັນຍາກາດທີ່ເບີກບານມ່ວນຊື່ນ.

ການປ່ຽນເເປງພຶດຕິກໍາ ແລະ ຝຶກທັກສະຊິວິດ

ກິດຈະກຳນີ້ ຄູ ແລະ ນັກຮຽນຢູ່ໂຮງຮຽນເປົ້າໝາຍ 12 ແຫ່ງ ໄດ້ເຮັດກິດຈະກຳ ການແຕ້ມຮູບຕາມໃຈ ແລະ ການລະບາຍສີ, ເຊິ່ງພວກເຮົາກໍໄດ້ສະໜອງອຸປະກອນຕ່າງໆເຊັ່ນ: ເຈ້ຍ, ສໍດໍາ ເເລະ ສໍສີ ເປັນຕົ້ນ. ເພື່ອເສີມສ້າງທັກສະຂອງນັກຮຽນກ່ຽວກັບການຈິນຕະນາການ ເເລະ ສາມາດບອກເລົ່າເລື່ອງລາວຕ່າງໆຜ່ານທາງຮູບເເຕ້ມໄດ້. ພວກເຮົາໄດ້ມີການໃຫ້ຄວາມຮູ້ກ່ຽວກັບໂພຊະນະການ, ບົດບາດຍິງຊາຍ, ສິ່ງແວດລ້ອມ, ກະສິກຳ ແລະ ກິລາພື້ນເມືອງ ແລະ ມີການນຳພາປະຕິບັດຕົວຈິງກ່ຽວກັບການແຕ່ງກິນທີ່ຖືກຫຼັກໂພຊະນາການ ໃຫ້ແກ່ຄູ, ຄພສບ, ນ້ອງນັກຮຽນ ຕະຫຼອດຮອດພໍ່ແມ່ຜູ້ປົກຄອງຂອງນັກຮຽນທີ່ເຂົ້າມາຮ່ວມ. ບັນຍາກາດແມ່ນເຕັມໄດ້ດ້ວຍຄວາມມ່ວນຊື່ນ, ຕື່ນເຕັ້ນ, ເອົາໃຈໃສ່ ແລະ ຫ້າວຫັນ.

ການສ້າງຂີດຄວາມສາມາດທາງດ້ານການສຶກສາໃຫ້ເເກ່ຊຸມຊົນ

ກິດຈະກຳນີ້ ຄູ ແລະ ນັກຮຽນຢູ່ໂຮງຮຽນເປົ້າໝາຍ 12 ແຫ່ງ ໄດ້ເຮັດກິດຈະກຳ ການແຕ້ມຮູບຕາມໃຈ ແລະ ການລະບາຍສີ, ເຊິ່ງພວກເຮົາກໍໄດ້ສະໜອງອຸປະກອນຕ່າງໆເຊັ່ນ: ເຈ້ຍ, ສໍດໍາ ເເລະ ສໍສີ ເປັນຕົ້ນ. ເພື່ອເສີມສ້າງທັກສະຂອງນັກຮຽນກ່ຽວກັບການຈິນຕະນາການ ເເລະ ສາມາດບອກເລົ່າເລື່ອງລາວຕ່າງໆຜ່ານທາງຮູບເເຕ້ມໄດ້. ພວກເຮົາໄດ້ມີການໃຫ້ຄວາມຮູ້ກ່ຽວກັບໂພຊະນະການ, ບົດບາດຍິງຊາຍ, ສິ່ງແວດລ້ອມ, ກະສິກຳ ແລະ ກິລາພື້ນເມືອງ ແລະ ມີການນຳພາປະຕິບັດຕົວຈິງກ່ຽວກັບການແຕ່ງກິນທີ່ຖືກຫຼັກໂພຊະນາການ ໃຫ້ແກ່ຄູ, ຄພສບ, ນ້ອງນັກຮຽນ ຕະຫຼອດຮອດພໍ່ແມ່ຜູ້ປົກຄອງຂອງນັກຮຽນທີ່ເຂົ້າມາຮ່ວມ. ບັນຍາກາດແມ່ນເຕັມໄດ້ດ້ວຍຄວາມມ່ວນຊື່ນ, ຕື່ນເຕັ້ນ, ເອົາໃຈໃສ່ ແລະ ຫ້າວຫັນ.

ພວກເຮົາໄດ້ເຊີນຄູຝຶກຈາກ ສະມາຄົມພັດທະນາທັກສະຊີວິດມາຝຶກອົບຮົມໃຫ້ແກ່ຄະນະພັດທະນາການສຶກສາຂັ້ນບ້ານ 40 ທ່ານ ໃນ 3 ຫົວຂໍ້ຄືື: ການຢູ່ຮ່ວມກັນແບບຫຼາກຫຼາຍວັດທະນະທຳຢ່າງມີຄວາມສຸກ, ການຄຸ້ມຄອງບໍລິຫານແບບມີສ່ວນຮ່ວມຂອງຊຸມຊົນ, ການພັດທະນາວິຊາຄວາມຮູ້ທ້ອງຖິ່ນ. ອີງໃສ່ການປະເມີນເບື້ອງຕົ້ນຂອງການຝຶກອົບຮົມເຫັນວ່າ ຜູ້ເຂົ້າຮ່ວມເຫັນໄດ້ເຖິງຂະບວນການຊຸກຍູ້ ເເລະ ນໍາພາຊຸມຊົນສ້າງເເຜນພັດທະນາໂຮງຮຽນຂອງຕົນ. ໂດຍຜູ້ເຂົ້າຮ່ວມໄດ້ຮຽນຮູ້ ເເລະ ເກັບກ່ຽວປະສົບການ ຈາກຮູບເເບບວິທີການເຮັດວຽກ ເພື່ອນໍາມາປັບໃຊ້ເຂົ້າໃນການປະຕິບັດກິດຈະກຳໃນຄັ້ງຕໍ່ໄປ.

ການສ້າງຄວາມເຂັ້ມແຂງໃຫ້ຄະນະພັດທະນາການສຶກສາຂັ້ນບ້ານ (ຄພສບ)

ກອງປະຊຸມພໍ່ແມ່ນັກຮຽນ

ກອງປະຊຸຸມຂັ້ນບ້ານໄດ້ຈັດຂື້ນໃນແຕ່ລະປີກ່ອນເປີດສົກຮຽນ ໃນປີທີ1 ໄດ້ຖືກຈັດຕັ້ງປະຕິບັດຂື້ນໂດຍໄດ້ແບ່ງອອກເປັນ 4 ກຸ່ມ. ກຳນົດເອົາບ້ານໃກ້ຄຽງກັນມາເຕົ້າໂຮມ ແລະ ປະຊຸມໃນສະຖານທີ່ດຽວກັນ. ເພື່ອຮ່ວມກັນວາງແຜນພັດທະນາການສຶກສາຂອງຊຸມຊົນ. ໂດຍຜູ້ເຂົ້າຮ່ວມຈາກຄະນະພັດທະນາການສຶກສາຂັ້ນບ້ານ, ສະມາຄົມພໍ່ແມ່ນັກຮຽນ, ຄູອາຈານ ໃນ 12 ໂຮງຮຽນປະຖົມເປົ້າໝາຍ. ເຊິ່ງລາຍລະອຽດມີດັ່ງນີ້:ໂຮງຮຽນປະຖົມສົມບູນ ພະນອມພອນ ໂດຍມີ 3 ບ້ານເຂົ້າຮ່ວມຄື: ຜັກກະດາ, ພະນອມພອນ ແລະ ຕາດຂາແດງ; ໂຮງຮຽນປະຖົມສົມບູນ ຄັນຕະກຽນ ມີ 4 ບ້ານ ເຂົ້າຮ່ວມຄື: ຄຳພູ, ຮ່ອງເໝືອງ, ບັງແບດໂຄກ ແລະ ຄັນຕະກຽນ. ໂຮງຮຽນປະຖົມສົມບູນ ກາງຕິ້ວ ມີ 4 ບ້ານເຂົ້າຮ່ວມຄື: ຕັບເຕົ່າ, ດົງຂວາງ, ກາງບອນ ເເລະ ກາງຕິ້ວ ແລະ ໂຮງຮຽນປະຖົມສົມບູນບ້ານທົ່ງ. ກອງປະຊຸມດັ່ງກ່າວເປັນກອງປະຊຸມປຶກສາຫາລືບັນຫາການສຶກສາ, ຊອກວິທີແກ້ໄຂຮ່ວມກັນ ແລະ ວາງແຜນເພື່ອການພັດທະນາໂຮງຮຽນບ້ານຂອງຕົນເອງ ຜ່ານກອງປະຊຸມເຫັນວ່າ ຄະນະພັດທະນາຂັ້ນບ້ານ ແລະ ພໍ່ແມ່ນັກຮຽນ ມີຄວາມເຂົ້າໃຈຫຼາຍຂື້ນ.

ກອງປະຊຸມຄະນະກໍາມະການໂຮງຮຽນ

ກອງປະຊຸມພໍ່ແມ່ນັກຮຽນ ໄດ້ຖືກຈັດຂື້ນໃນ 12 ບ້ານເປົ້າໝາຍ. ເຊິ່ງມີຜູ້ເຂົ້າຮ່ວມຈັດຕັ້ງປະຕິບັດຈາກ ວິຊາການຈາກຫ້ອງການສຶກສາທິການ ແລະ ກິລາເມືອງ, ຄະນະຈຸດສຸມ, ຄະນະພັດທະນາການສຶກສາຂັ້ນບ້ານທັງໝົດ, ສະມາຄົມພໍ່ແມ່ນັກຮຽນທັງໝົດ ແລະ ຄູໃນໂຮງຮຽນທັງໝົດ. ໂດຍໄດ້ມີການແລກປ່ຽນ ແລະ ຮຽນຮູ້ຮ່ວມກັນ, ເພື່ອຈະໄດ້ນຳເອົາຂໍ້ດີໄປປັບໃຊ້ໃຫ້ຖືກວິທີ ເພື່ອສົ່ງເສີມວຽກງານການສຶກສາໃຫ້ດີຂື້ນ.

ຜົນໄດ້ຮັບຂອງໂຄງການ

1 ອັດຕາການປະລະ ແລະ ການຄ້າງຫ້ອງຮຽນຂອງນັກຮຽນຢູ່ໂຮງຮຽນເປົ້າໝາຍ ສະເລ່ຍໃນ 12 ໂຮງຮຽນ ເທົ່າກັບ 0.42% ສາມາດປະຕິບັດໄດ້ເກີນແຜນ. ໂດຍອີງໃສ່ແຜນທີ່ວາງໄວ້ 5%

2 ຄະແນນສະເລ່ຍ 88% ຈາກການປະເມີນ ຄູສອນຢູ່ໃນໂຮງຮຽນເປົ້າໝາຍ ນຳໃຊ້ເຕັກນິກທີ່ໄດ້ຮັບ ການເຝິກອົບຮົມຈາກໂຄງການ (ຄູທັງໝົດ 36 ຄົນ). ສາມາດປະຕິບັດໄດ້ເກີນເປົ້າໝາຍທີ່ວາງໄວ້ (80%)

3 ຄະນະພັດທະນາການສືກສາຂັ້ນບ້ານລິເລີ່ມການບຳລຸງຮັກສາ ແລະ ສ້ອມແປງໂຮງຮຽນໂດຍການສະໜັບສະໜູບຈາກຊາວບ້ານຄະແນນສະເລ່ຍ 83% ຈາກການສຸ່ມສຳພາດ 6 ໂຮງຮຽນເປົ້າໝາຍ 30 ທ່ານ ຂອງຄະນະພັດທະນາການສຶກສາຂັ້ນບ້ານ ສາມາດປະຕິບັດໄດ້ເກີນແຜນທຽບໃສ່ແຜນທີ່ວາງໄວ້ 50%

ຜົນໄດ້ຮັບຂອງໂຄງການ

ຢູ່ 18 ບ້ານ ແຂວງສະຫວັນນະເຂດ ແລະ 25 ບ້ານ ແຂວງຫົວພັນ

ຂໍ້ມູນກ່ຽວກັບ ໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົນ

ໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົນ ແມ່ນໜຶ່ງໃນໂຄງການຂອງ ສະມາຄົມເພື່ອການສະໜັບສະໜູນ ແລະ ປັບປຸງຊົນນະບົດ (ສພປ), ທີ່ໄດ້ຈັດຕັ້ງປະຕິບັດຢູ່ 18 ບ້ານ ໃນນະຄອນໄກສອນ ພົມວິຫານ, ແຂວງສະຫວັນນະເຂດ ແລະ 25 ບ້ານ ໃນເມືອງຊຳເໜືອ, ແຂວງຫົວພັນ. ໂຄງການນີ້ໄດ້ຮັບທຶນຈາກກະຊວງການຕ່າງປະເທດລຸກຊຳບວກ, ມູນຄ່າ 957,000 ໂດລາສະຫະລັດ, ເຊິ່ງມີໄລຍະການຈັດຕັ້ງປະຕິບັດໂຄງການໃນໄລຍະເດືອນ ມິຖຸນາ 2020 ເຖິງ ເດືອນພະຈິກ 2022. ໂດຍໄດ້ມີການຮ່ວມມືກັບກົມນະໂຍບາຍຕໍ່ຜູ້ມີຜົນງານ, ພິການ ແລະ ຜູ້ອາຍຸສູງ (ກອງເລຂາຄະນະກຳມະການແຫ່ງຊາດເພື່ອຄົນພິການ ແລະ ຜູ້ອາຍຸສູງ), ອົງການເພື່ອມະນຸດສະທຳ ແລະ ການມີສ່ວນຮ່ວມ (HI).

ໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົນ ເປັນໂຄງການໜື່ງທີ່ໄດ້ສະໜັບສະໜູນ ແລະ ປະກອບສ່ວນເຂົ້າໃນການປະຕິບັດເປົ້າໝາຍການພັດທະນາແບບຍືນຍົງ SDG 10: ຫຼຸດຜ່ອນຄວາມບໍ່ສະເໝີພາບຢູ່ພາຍໃນປະເທດ ແລະ ລະຫວ່າງປະເທດ; SDG 18: ຊີວິດທີ່ປອດໄພຈາກລະເບີດທີ່ບໍ່ທັນແຕກ, ເກັບກູ້ລະເບີດບໍ່ທັນແຕກທີ່ຕົກຄ້າງເພື່ອການພັດທະນາແຫ່ງຊາດ ແລະ ກໍ່ເປັນການປະກອບສ່ວນເຂົ້າໃນແຜນພັດທະນາເສດຖະກິດ - ສັງຄົມແຫ່ງຊາດ 5 ປີ ຄັັ້ງທີ IX ເຊິ່ງນອນຢູ່ໃນເປົ້າໝາຍທີ 2 ແຜນວຽກຈຸດສຸມທີ 3 ຄື: ສົ່ງເສີມ ແລະ ສ້າງໂອກາດໃຫ້ແມ່ຍິງ, ໄວໜຸ່ມ, ເດັກນ້ອຍ, ຜູ້ດ້ອຍໂອກາດ ແລະ ຜູ້ເສຍອົງຄະ ໄດ້ຮັບການພັດທະນາ ແລະ ປະກອບສ່ວນຢ່າງເຕັມທີ່ໃນການພັດທະນາເສດຖະກິດສັງຄົມ ແລະ ແຜນວຽກຈຸດສຸມທີ 5 ຄື: ການກວດກູ້ລະເບີດບໍ່ທັນແຕກ ແລະ ຊິວິດຂອງປະຊາຊົນມີຄວາມປອດໄພຈາກລະເບີດບໍ່ທັນແຕກເພີ່ມຂື້ນເທື່ອລະກ້າວ.

ການສຳຫຼວດກຸ່ມຄົນທີ່ມີຄວາມພິການຢູ່ໃນຊຸມຊົນ, ທັງໃນຕົວເມືອງ ແລະ ຊານເມືອງກ່ອນການຈັດຕັ້ງປະຕິບັດໂຄງການ, ພວກເຮົາໄດ້ພົບເຫັນວ່າ ຍັງມີກຸ່ມຄົນພິການຫຼາຍທີ່ຍັງບໍ່ສາມາດເຂົ້າຮ່ວມກິດຈະກຳ ແລະ ເຂົ້າເຖິງການບໍລິການທາງສັງຄົມໃນຊຸມຊົນໄດ້ເຕັມທີ່. ເຊິ່ງນຳໄປສູ່ອຸປະສັກໃນການສ້າງລາຍໄດ້ໃຫ້ແກ່ພວກເຂົາ. ສະນັ້ນ, ເພື່ອເປັນການເສີມສ້າງຂີດຄວາມສາມາດ, ສະໜັບສະໜູນສົ່ງເສີມ ແລະ ແກ້ໄຂບັນຫາດັ່ງກ່າວຂ້າງເທິງ, ໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົນຈື່ງໄດ້ເກີດຂື້ນ, ເພື່ອສະໜັບສະໜູນຄົນພິການໃຫ້ໄດ້ຮັບການປັບປຸງດ້ານສຸຂະພາບ, ມີເງື່ອນໄຂໃນການດຳລົງຊີວິດ, ມີການເຂົ້າຮ່ວມໃນສັງຄົມ, ເຊິ່ງຜູ້ໄດ້ຮັບຜົນປະໂຫຍດແມ່ນຄົນພິການໃນພື້ນທີ່ເປົ້າໝາຍຂອງໂຄງການເຊີ່ງມີຄາດຄະເນຜົນຮັບໄວ້ດັ່ງນີ້:

ພາກສ່ວນທີ່ກ່ຽວຂ້ອງ ໃນວຽກງານພັດທະນາ ການມີສ່ວນຮ່ວມໃນພື້ນຖານຂັ້ນຊຸມຊົນ, ໃນຂັ້ນສູນກາງ ແລະ ທ້ອງຖິ່ນ (ຢູ່ 2 ແຂວງ) ໄດ້ຮັບການສ້າງຄວາມອາດສາມາດ, ຄວາມຮູ້ທາງວິຊາການ ແລະ ທັກສະ
ການເຊື່ອມໂຍງລະຫວ່າງວຽກງານຟື້ນຟູໜ້າທີ່ການ ແລະ ການດຳເນີນກິດຈະກຳການສ້າງລາຍຮັບໄດ້ຮັບການປັບປຸງດີຂື້ນ
ຄົນພິການໃນແຂວງສະຫວັນນະເຂດ ແລະ ແຂວງຫົວພັນມີຄວາມພໍໃຈຕໍ່ກັບຄວາມຮັບຮູ້ທີ່ເພີ່ມຂື້ນ ແລະ ສາມາດເຂົ້າເຖິງການບໍລິການໃນການປັບປຸງຊີວິດການເປັນຢູ່ ແລະ ການຟື້ນຟູໜ້າທີ່ການ

ໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົນ ມີ 4 ກິດຈະກຳຫຼັກ ແລະ 23 ກິດຈະກຳຍ່ອຍ

ອົງການຈັດຕັ້ງມະຫາຊົນ (ສະຫະພັນແມ່ຍິງ ອົງການອື່ນໆທີ່ກ່ຽວຂ້ອງ ຫຼື ກຸ່ມຊວ່ຍເຫຼືອຕົນເອງ) ເພື່ອປະເມີນສິ່ງກີດຂວາງຕ່າງໆສໍາລັບຜູ້ທີ່ມີຄວາມເປັນພິການ

ການປະເມີນພາບລວມກ່ຽວກັບອຸປະສັກຕ່າງໆ ແລະ ການມີສ່ວນຮ່ວມສະຫະພັນແມ່ຍິງນະຄອນໄກສອນ
ການປະເມີນພາບລວມກ່ຽວກັບອຸປະສັກຕ່າງໆ ແລະ ການມີສ່ວນຮ່ວມສະຫະພັນແມ່ຍິງ ແລະ ຊາວໜຸ່ມ ເມືອງຊໍາເໜືອ
ສະໜອງທຶນຍ່ອຍໃຫ້ກັບສະຫະພັນແມ່ຍິງເມືອງຊໍາເໜືອ
ສະໜັບສະໜູນອົງການຈັດຕັ້ງມະຫາຊົນ ແລະ ອົງການຈັດຕັ້ງທີ່ກ່ຽວຂ້ອງນະຄອນໄກສອນພົມວິຫາ
ສະໜັບສະໜູນການຮຽນ-ການສອນ

ປະເມີນຄວາມເປັນພິການ ໃນພື້ນທີ່ເປົ້າໝາຍ ແລະ ສົ່ງຕໍ່ເຂົາເຈົ້າຍັງໄປສູນການແພດຟຶ້ນຟູໜ້າທີ່ການຂັ້ນແຂວງ

ກອງປະຊຸມປຶກສາຫາລືການວາງແຜນຈັດຕັ້ງປະຕິບັດກັບອົງການຈັດຕັ້ງບ້ານ ແລະ ຄູ່ຮ່ວມງານທີ່ກ່ຽວຂ້ອງ
ກອງປະຊຸມການສ້າງຄວາມເຂົ້້າໃຈກ່ຽວກັບຄວາມເປັນພິການ ແລະ ຄັດເລືອກກຸ່ມເປົ້າໝາຍ
ການເຜີຍແຜ່ການຈັດລໍາລັບບຸລິມະສິດ ແລະ ໃຫ້ຄັດເລືອກຜູ້ໄດ້ຮັບຜົນປະໂຫຍດ
ປະເມີນຄວາມຫຍຸ້ງຍາກໜ້າທີການ ແລະ ຄວາມຕ້ອງການລາຍບຸກຄົນ ໂດຍໃຊ້ເຄື່ອງມືປະເມີນ
ສ້າງແຜນປະຕິບັດ (ໂດຍເອົາຄອບຄົວກຸ່ມເປົ້າໝາຍເປັນໃຈກາງ)
ການ ສົ່ງຕໍ່ໄປຫາອຸປະກອນຊ່ວຍ/ເຄື່ອງຄໍ້າຊູ (ຂາທຽມ, ແຂນທຽມ, ໄມ້ເທົ້າຊ່ວຍນໍາທາງ, ລໍ້ເລື່ອນ, ເຄື່ອງຊ່ວຍຟັງ)
ການ ສົ່ງຕໍ່ ຟື້ນຟູບໍາບັດສຸຂະພາບ
ການສົ່ງຕໍ່ກໍລະນີສຸກເສີນ
ການສໍາພາດພາຍຫຼັງສໍາເລັດກິດຈະກໍາ

ເພື່ອໃຫ້ຄົນພິການໄດ້ຮັບການຍົກລະດັບຄວາມຮູ້ ແລະ ຄວາມສາມາດດ້ານເຕັກນິກວິຊາການ ແລະ ຄວາມຮູ້ດ້ານການເງິນເພື່ອດຳເນີນ ກິດຈະກໍາການສ້າງລາຍຮັບແບບສ່ວນບຸກຄົນ

ຝຶກອົບຮົມກ່ຽວກັບດ້ານການເງິນ
ຝຶກອົບຮົມດ້ານເຕັກນິກສໍາລັບກິດຈະກໍາສ້າງລາຍຮັບ
ສະໜັບສະໜູນ ແລະ ສົ່ງເສີມກິດຈະກໍາສ້າງລາຍຮັບ ຂອງໄລຍະເວລາ ແຕ່ 3-6 ເດືອນ, ໃຫ້ 280 ກໍລະນີ

ການຕິດຕາມ ແລະ ການປະສານງານ

ກອງປະຊຸມປະຈໍາເດືອນ
ກອງປະຊຸມປະຈໍາໄຕມາດ
ການຕິດຕາມ ແລະ ຊຸກຍູ້ຂອງຄະນະຊີ້ນໍາໂຄງການ ທຸກໆ 6 ເດືອນ
ກອງປະຊຸມປະຈໍາປີ
ກອງປະຊຸມປິດໂຄງການ

ອົງການຈັດຕັ້ງມະຫາຊົນ (ສະຫະພັນແມ່ຍິງ ອົງການອື່ນໆທີ່ກ່ຽວຂ້ອງ ຫຼື ກຸ່ມຊວ່ຍເຫຼືອຕົນເອງ) ເພື່ອປະເມີນສິ່ງກີດຂວາງຕ່າງໆສໍາລັບຜູ້ທີ່ມີຄວາມເປັນພິການ

ການປະເມີນພາບລວມກ່ຽວກັບອຸປະສັກຕ່າງໆ ແລະ ການມີສ່ວນຮ່ວມສະຫະພັນແມ່ຍິງນະຄອນໄກສອນ

ຢູ່ ນະຄອນໄກສອນພົມວິຫານ, ແຂວງສະຫວັນນະເຂດ ໄດ້ຈັດກິດຈະກຳປຶກສາຫາລືກ່ຽວກັບການມີສ່ວນຮ່ວມຂອງອົງການຈັດຕັ້ງມະຫາຊົນ ຕໍ່ກັບວຽກງານສົ່ງເສີມຜູ້ທີ່ມີຄວາມເປັນພິການ ພ້ອມທັງໄດ້ເຂົ້າພົບສະຫະພັນແມ່ຍິງ, ຄະນະບໍລິຫານງານຊາວໜຸ່ມ, ສະຫະພັນກຳມະບານ, ສະຫະພັນນັກຮົບເກົ່າ, ແນວລາວສ້າງຊາດນະຄອນໄກສອນພົມວິຫານ, ສະມາຄົນຄົນພິການ ແລະ ສະມາຄົມຄົນຕາບອດ. ເຊິ່ງມີຫຼາຍພາກສ່ວນທີ່ເຂົ້າຮ່ວມ ແລະ ແລກປ່ຽນຄວາມຄິດເຫັນຮ່ວມກັນ. ເພື່ອປະເມີນພາບລວມກ່ຽວກັບບັນຫາ ແລະ ອຸປະສັກຕ່າງໆໃນການມີສ່ວນຮ່ວມ, ໃນການເຂົ້າເຖິງຂອງກຸ່ມຄົນພິການ.

ການປະເມີນພາບລວມກ່ຽວກັບອຸປະສັກຕ່າງໆ ແລະ ການມີສ່ວນຮ່ວມສະຫະພັນແມ່ຍິງ ແລະ ຊາວໜຸ່ມ ເມືອງຊໍາເໜືອ

ຢູ່ ເມືອງຊຳເໜືອ, ແຂວງຫົວພັນ ກ່ໍໄດ້ຈັດກິດຈະກຳປຶກສາຫາລືກ່ຽວການມີສ່ວນຮ່ວມຂອງອົງການຈັດຕັ້ງມະຫາຊົນຕໍ່ກັບວຽກງານສົ່ງເສີມຜູ້ທີ່ມີຄວາມເປັນພິການ. ເຊິ່ງໄດ້ເຂົ້າພົບປະສະຫະພັນແມ່ຍິງ, ຄະນະບໍລິຫານງານຊາວໜຸ່ມ, ສະຫະພັນກໍາມະບານ, ສະຫະພັນນັກຮົບເກົ່າ, ແນວລາວສ້າງຊາດເມືອງຊໍາເໜືອ, ສະມາຄົມຄົນພິການ. ເພື່ອປະເມີນພາບລວມກ່ຽວກັບອຸປະສັກຕ່າງໆທີ່ມີໃນຊຸມຊົນ.

ສະໜອງທຶນຍ່ອຍໃຫ້ກັບສະຫະພັນແມ່ຍິງເມືອງຊໍາເໜືອ

ພວກເຮົາໄດ້ສະໜອງທຶນຍ່ອຍໃຫ້ແກ່ສະຫະພັນແມ່ຍິງເມືອງຊໍາເໜືອສະເຫຼີມສະຫຼອງວັນແມ່ຍິງແຫ່ງຊາດ ແລະ ສາກົນ ເພື່ອເປັນການຍົກລະດັບການມີສ່ວນຮ່ວມຂອງຄົນພິການ, ໂດຍສະເພາະແມ່ນແມ່ຍິງທີ່ມີຄວາມເປັນພິການໃນພື້ນທີ່ໂຄງການ. ເຊິ່ງຈັດຂຶ້ນຢູ່ທີ່ສະໂມສອນແຂວງຫົວພັນ, ຜູ້ເຂົ້າຮ່ວມ 194 ທ່ານ (ຍິງ 29 ທ່ານ) ແລະ ຄົນພິການ 16 ທ່ານ (ຍິງ 4 ທ່ານ).

ສະໜັບສະໜູນອົງການຈັດຕັ້ງມະຫາຊົນ ແລະ ອົງການຈັດຕັ້ງທີ່ກ່ຽວຂ້ອງ

ຢູ່ແຂວງສະຫວັນນະເຂດ, ໄດ້ຈັດກິດຈະກຳຮ່ວມກັບອົງການຈັດຕັ້ງມະຫາຊົນ ແລະ ອົງການຈັດຕັ້ງທີ່ກ່ຽວຂ້ອງຫຼາຍແຫ່ງເຊັ່ນ: ກິດຈະກຳສະເຫຼີມສະຫຼອງວັນແມ່ຍິງສາກົນທີ່ສະມາຄົມຄົນພິການຕາສາຂາສະຫວັນນະເຂດ, ລົງເຜີຍແຜ່ກົດໝາຍວ່າດ້ວຍຄົນພິການໃນ 18 ບ້ານເປົ້າໝາຍ ຮ່ວມກັບ ສະມາຄົມຄົນພິການແຫ່ງຊາດລາວ, ປະກອບສ່ວນມອບອຸປະກອນການແພດ ແລະ ອຸປະກອນປ້ອງກັນໃຫ້ກັບພະແນກສາທາລະນະສຸກ. ສ່ວນແຂວງຫົວພັນເອງກໍ່ໄດ້ຈັດກິດຈະກຳເຊັ່ນກັນຄື: ໄດ້ດໍາເນີນການເຜີຍແຜ່ກົດໝາຍວ່າດ້ວຍຄົນພິການຢູ່ 25 ບ້ານ ສະມາຄົມຄົນພິການສາຂາ ແຂວງຫົວພັນ, ກິດຈະກຳສະເຫຼີມສະຫຼອງວັນແມ່ຍິງສາກົນ ທີ່ສະມາຄົມຄົນພິການຕາລາວສາຂາຫົວພັນ, ສະໜັບສະໜູນອົງການຈັດຕັ້ງມະຫາຊົນກັບແນວລາວສ້າງຊາດຈັດກິດຈະກໍາສະເຫຼີມສະຫຼອງວັນສຳຄັນຕ່າງໆ.

ການປະເມີນຄວາມເປັນພິການໃນພື້ນທີ່ເປົ້າໝາຍ ແລະ ສົ່ງຕໍ່ໄປຍັງສູນການແພດຟຶ້ນຟູໜ້າທີ່ການຂັ້ນແຂວງ

ການປຶກສາຫາລື, ວາງແຜນຈັດຕັ້ງປະຕິບັດກັບອົງການຈັດຕັ້ງບ້ານ ແລະ ຄູ່ຮ່ວມງານທີ່ກ່ຽວຂ້ອງ

ພວກເຮົາໄດ້ຈັດກອງປະຊຸມປຶກສາຫາລືການວາງແຜນຈັດຕັ້ງປະຕິບັດກັບຄູ່ຮ່ວມງານຢູ່ພື້ນທີ່ຂອງໃຜລາວ (ແຂວງສະຫວັນນະເຂດ ແລະ ແຂວງຊຳເໜືອ), ໂດຍໄດ້ຈັດກອງປະຊຸມປຶກສາຫາລືການວາງແຜນຈັດຕັ້ງຮ່ວມກັບຫ້ອງວ່າການປົກຄອງເມືອງ ແລະ ອົງການຈັດຕັ້ງຂັ້ນບ້ານ. ຈຸດປະສົງກ່ໍເພື່ອນໍາສະເໜີຈຸດປະສົງ ແລະ ພາບລວມຂອງໂຄງການ, ປຶກສາຫາລືຂັ້ນຕອນການດຳເນີນກິດຈະກຳຂອງໂຄງການຢູ່ໃນບ້ານເປົ້າໝາຍ.

ກອງປະຊຸມຂັ້ນບ້ານກ່ຽວກັບການສ້າງຄວາມເຂົ້າໃຈກ່ຽວກັບຄວາມເປັນພິການ ແລະ ຄັດເລືອກກຸ່ມເປົ້າໝາຍ

ພວກເຮົາໄດ້ຈັດຕັ້ງປະຕິບັດກິດຈະກຳ ການສ້າງຄວາມເຂົ້າໃຈໃຫ້ແກ່ຊຸມຊົນກ່ຽວກັບຄວາມເປັນພິການ ແລະ ການຄັດກອງກຸ່ມເປົ້າໝາຍເພື່ອສ້າງຄວາມເຂົ້າໃຈ ຫຼື ເພີ່ມຄວາມຮັບຮູ້ໃຫ້ກັບຊຸມຊົນກ່ຽວກັບຄວາມເປັນພິການໃຫ້ແກ່ອົງການຈັດຕັ້ງຂັ້ນບ້ານ, ຜູ້ດູແລ ແລະ ກຸ່ມເປົ້າໝາຍ. ເພື່ອຄັດເລືອກ ແລະ ຊອກຫາຄົນທີ່ມີຄວາມເປັນພິການຢູ່ໃນຊຸມຊົນ ຢູ່ 18 ບ້ານທີ່ນະຄອນໄກສອນພົມວິຫານ, ແຂວງສະຫວັນນະເຂດ ແລະ 25 ບ້ານທີ່ ເມືອງຊຳເໜືອ, ແຂວງຫົວພັນ.

ຈັດບຸລິມະສິດ ແລະ ຄັດເລືອກຜູ້ໄດ້ຮັບຜົນປະໂຫຍດ

ຫຼັງຈາກພວກເຮົາຈັດກອງປະຊຸມສ້າງຄວາມເຂົ້າໃຈໃຫ້ແກ່ຊຸມຊົນກ່ຽວກັບຄວາມເປັນພິການ ແລະ ການຄັດກອງກຸ່ມເປົ້າໝາຍແລ້ວ, ພວກເຮົາໄດ້ສືບຕໍ່ຈັດກິດຈະກໍາການເຜີຍແຜ່ຜົນການຈັດລໍາດັບບຸລິມະສິດ ແລະ ຄັດເລືອກຜູ້ໄດ້ຮັບຜົນປະໂຫຍດໂດຍມີຄູ່ຮ່ວມງານຫຼັກຂອງໂຄງການ ແລະ ອໍານາດການປົກຄອງບ້ານເປົ້າໝາຍພ້ອມຄະນະໃຫ້ການຊຸກຍູ້ ເພື່ອເປັນການສະຫຼຸບຜົນຂອງກຸ່ມເປົ້າໝາຍທີ່ໄດ້ຮັບການຄັດເລືອກ. ຢູ່ນະຄອນໄກສອນພົມວິຫານ ຜູ້ເຂົ້າຮ່ວມ 153 ທ່ານ (ຍິງ 38 ທ່ານ), ຢູ່ເມືອງຊໍາເໜືອ ຜູ້ເຂົ້າຮ່ວມ 371 ທ່ານ (ຍິງ 148 ທ່ານ), ຄົນພິການ 4 ທ່ານ (ຍິງ 1 ທ່ານ).

ການຍົກລະດັບຄວາມຮູ້ ແລະ ຄວາມສາມາດດ້ານເຕັກນິກ ວິຊາການ ແລະ ຄວາມຮູ້ດ້ານການເງິນໃນກິດຈະກໍາສ້າງລາຍຮັບແບບສ່ວນບຸກຄົນ 280 ກໍລະນີ

ປະເມີນຄວາມຫຍຸ້ງຍາກໜ້າທີການ ແລະ ຄວາມຕ້ອງການລາຍບຸກຄົນ ໂດຍໃຊ້ເຄື່ອງມືປະເມີນ

ທີມງານໂຄງການຂອງ 2 ພື້ນທີ່ ໄດ້ລົງຈັດຕັ້ງປະຕິບັດກິດຈະກຳເພື່ອປະເມີນຄວາມຫຍຸ້ງຍາກໜ້າທີການ ແລະ ຄວາມຫຍຸ້ງຍາກລາຍບຸກຄົນໂດຍໃຊ້ເຄື່ອງມືປະເມີນ. ເຊິ່ງການລົງປະເມີນໃນຄັ້ງນີ້ປະກອບມີ: ການລົງປະເມີນດ້ານໜ້າທີການ, ລົງປະເມີນສຸຂະພາບຕາເບື້ອງຕົ້ນ ແລະ ລົງປະເມີນຄວາມຕ້ອງການລາຍບຸກຄົນ... ສາມາດສັງລວມປະເພດຂອງຄວາມເປັນພິການຄື: ທາງດ້ານຮ່າງກາຍ, ດ້ານການໄດ້ຍິນ, ດ້ານການປາກເວົ້າ, ດ້ານສະຕິປັນຍາ, ດ້ານການຈື່ຈໍາ ແລະ ດ້ານອື່ນໆ.

ສ້າງແຜນປະຕິບັດ (ໂດຍເອົາຄອບຄົວກຸ່ມເປົ້າໝາຍເປັນໃຈກາງ)

ພວກເຮົາໄດ້ສືບຕໍ່ໃຫ້ທີມງານແຕ່ລະພື້ນທີ່ຈັດກິດຈະກຳສ້າງແຜນປະຕິບັດໃນການເອົາຄອບຄົວກຸ່ມເປົ້າໝາຍເປັນໃຈກາງ, ເຊິ່ງທີມງານພື້ນທີ່ສະຫວັນນະເຂດໄດ້ສຳເລັດການລົງສ້າງແຜນປະຕິບັດໃນບ້ານເປົ້າໝາຍ ແລະ ສາມາດຄັດເລືອກໄດ້ 60 ກໍລະນີ. ສ່ວນທີມງານພື້ນທີ່ແຂວງຫົວພັນ ກໍ່ໄດ້ສຳເລັດການລົງສ້າງແຜນປະຕິບັດໃນບ້ານເປົ້າໝາຍ ແລະ ສາມາດຄັດເລືອກໄດ້ 80 ກໍລະນີ. ເຊິ່ງກິດຈະກຳທີ່ສະໜັບສະໜູນໃຫ້ແກ່ຄອບຄົວເປົ້າໝາຍປະກອບມີ: ກິດຈະກຳການລ້ຽງແບ້, ກິດຈະກຳການລ້ຽງໄກ່, ກິດຈະກຳການລ້ຽງໝູ, ທຸລະກິດການຕັດຫຍິບ, ການເຮັດຂອງກິນຂາຍ ແລະ ການສ້ອມແປງຄອມ.

ຝຶກອົບຮົມກ່ຽວກັບດ້ານການເງິນ

ພວກເຮົາທີ່ປະຈຳຢູ່ແຕ່ລະພື້ນທີ່ໄດ້ພາກັນຈັດຝຶກອົບຮົມໃຫ້ກຸ່ມເປົ້າໝາຍ ກ່ຽວກັບການບໍລິຫານດ້ານການເງິນຄົວເຮືອນ ແລະ ບຸກຄົນ. ຈຸດປະສົງກໍເພື່ອໃຫ້ກຸ່ມເປົ້າໝາຍໄດ້ມີຄວາມຮັບຮູ້ ແລະ ເຂົ້າໃຈກ່ຽວກັບການບໍລິຫານເງິນ, ຮູ້ວາງແຜນດ້ານການເງິນ, ການເກັບເງິນ-ທ້ອນເງິນ ເພື່ອທີ່ເຂົາເຈົ້າຈະສາມາດນຳເອົາຄວາມຮູ້ທີ່ໄດ້ຝຶກມາໄປນຳໃຊ້ໄດ້ໃນຕົວຈິງ ແລະ ເກີດປະໂຫຍດ.

ຝຶກອົບຮົມດ້ານຕິກນິກສໍາລັບກິດຈະກໍາສ້າງລາຍຮັບ

ກິດຈະກຳການຝຶກອົບຮົມທາງດ້ານເຕັກນິກສຳລັບການສ້າງລາຍຮັບຈັດຂື້ນຢູ່ 2 ພື້ນທີ່ຄືກັນກັບກິດຈະກຳທີ່ຜ່ານມາ, ໃນພື້ນທີ່ແຂວງສະຫວັນນະເຂດ. ພວກເຮົາໄດ້ຈັດຝຶກອົບຮົມການລ້ຽງສັດໃຫ້ກຸ່ມເປົ້າໝາຍ ເພື່ອໃຫ້ເຂົາເຈົ້າໄດ້ມີຄວາມຮູ້ກ່ຽວກັບການເບິ່ງແຍງໃສ່ໃຈສັດລ້ຽງປະກອບມີ: ວິທີ ແລະ ຂັ້ນຕອນຕ່າງໆໃນການລ້ຽງແບ້, ການລ້ຽງໄກ່. ສ່ວນພື້ນທີ່ແຂວງຫົວພັນ ພວກເຮົາກໍໄດ້ຈັດຝຶກອົບຮົມການລ້ຽງສັດໃຫ້ກັບສັດຕະວະແພດພາຍໃນບ້ານຂອງກຸ່ມເປົ້າໝາຍເຊັ່ນກັນ ເພື່ອໃຫ້ເຂົາເຈົ້າສາມາດນຳເອົາເຕັກນິກການລ້ຽງສັດໄປສົ່ງຕໍ່ ແລະ ສາມາດຕິດຕາມຊຸກຍູ້ກຸ່ມເປົ້າໝາຍຂອງໂຄງການໄດ້ໃນແຕ່ລະໄລຍະ.

ຝຶກອົບຮົມດ້ານຕິກນິກສໍາລັບກິດຈະກໍາສ້າງລາຍຮັບ

ໃນໄລຍະເວລາກິດຈະກຳແຕ່ 3-6 ເດືອນຂອງໂຄງການ ພວກເຮົາໄດ້ລົງສະໜັບສະໜູນ ແລະ ສົ່ງເສີມກິດຈະກໍາສ້າງລາຍຮັບໃຫ້ກັບກຸ່ມເປົ້າໝາຍ 280 ກໍລະນີ, ໃນນີ້ຢູ່ພື້ນທີ່ແຂວງສະຫວັນນະເຂດມີ 120 ກໍລະນີ. ສ່ວນພື້ນທີ່ແຂວງຫົວພັນແມ່ນ 160 ກໍລະນີ. ເຊິ່ງມີກິດຈະກຳຕ່າງໆດັ່ງນີ້: ສຳເລັດການມອບອຸປະກອນສ້າງຄອກແບ້ ແລະ ສະໜອງແບ້ໃຫ້ກຸ່ມເປົ້າໝາຍ, ມອບອຸປະກອນສ້າງຄອກໄກ່, ອຸປະກອນການລ້ຽງໄກ່ ແລະ ອາຫານໄກ່ໃຫ້ກັບກຸ່ມເປົ້າໝາຍ, ສະໜອງອຸປະກອນສໍາລັບການສ້າງຄອກໝູ ແລະ ອຸປະກອນສຳລັບລ້ຽງໝູ, ໄດ້ມອບປາ ແລະ ອຸປະກອນການລ້ຽງປາໃຫ້ກັບກຸ່ມເປົ້າໝາຍອີກດ້ວຍ.

ກອງປະຊຸມປະຈໍາເດືອນ

ໃນທຸກໆເດືອນ, ພວກເຮົາໃນແຕ່ລະພື້ນທີ່ຈະມີການຈັດກອງປະຊຸມປະຈຳເດືອນຂື້ນໃນພື້ນທີ່ຂອງໃຜລາວ, ໂດຍພວກເຮົາຈະມີການແລກປ່ຽນ ແລະ ປຶກສາຫາລືສະເພາະທາງທີມງານໂຄງການພາຍໃນກ່ອນ, ຫຼັງຈາກນັ້ນກໍໄດ້ມີການປະຊຸມຮ່ວມກັບຄູ່ຮ່ວມງານ ເພື່ອລາຍງານຄວາມຄືບໜ້າການຈັດຕັ້ງປະຕິບັດວຽກຜ່ານມາ ແລະ ລາຍງານແຜນວຽກເດືອນຕໍ່ໄປ ທີ່ຫ້ອງການປະສານງານໂຄງການຂອງພື້ນທີ່ໃຜລາວ.

ກອງປະຊຸມປະຈໍາໄຕມາດ

ນອກຈາກພວກເຮົາຈະມີການຈັດກອງປະຊຸມປະຈຳເດືອນສະເພາະທີມງານໂຄງການຂອງແຕ່ລະພື້ນທີ່ແລ້ວ, ພວກເຮົາຍັງໄດ້ຈັດກອງປະຊຸມປະຈໍາໄຕມາດ ກໍຄືໃນທຸກໆ 3 ເດືອນ ພວກເຮົາຈະຈັດ 1 ຄັ້ງ. ໃນສົກປີ 2020-2021 ແມ່ນພວກເຮົາໄດ້ຈັດກອງປະຊຸມປະຈຳໄຕມາດສໍາເລັດ 3 ຄັ້ງ. ຈຸດປະສົງກໍເພື່ອລາຍງານຄວາມຄືບໜ້າຂອງການຈັດຕັ້ງປະຕິບັດວຽກງານຂອງໂຄງການໂດຍສັງລວມໃນໄລຍະ 3 ເດືອນຜ່ານມາ, ລາຍງານຈຸດດີ-ຈຸດຕ້ອງປັບປຸງ, ລວມເຖິງບັນຫາສິ່ງທ້າທາຍ-ວິທີແກ້ໄຂຕ່າງໆ ແລະ ລາຍງານແຜນວຽກໃນອີກ 3 ເດືອນຕໍ່ໜ້າ.

ການຕິດຕາມ ແລະ ຊຸກຍູ້ຂອງຄະນະຊີ້ນໍາໂຄງການ ທຸກໆ 6 ເດືອນ

ເພື່ອເປັນການລົງຕິດຕາມ ແລະ ຊຸກຍູ້ການຈັດຕັ້ງປະຕິບັດກິດຈະກຳຂອງໂຄງການ, ພວກເຮົາທີມງານໂຄງການໄດ້ລົງຢ້ຽມຢາມກຸ່ມເປົ້າໝາຍຂອງແຕ່ລະພື້ນທີ່. ເຊິ່ງ 6 ເດືອນທີ່ຜ່ານມານີ້, ໃນພື້ນທີ່ແຂວງ ສະຫວັນນະເຂດ ພວກເຮົາຮ່ວມກັບທີມງານໂຄງການ ແລະ ຄູ່ຮ່ວມງານໄດ້ລົງຢ້ຽມຢາມກຸ່ມເປົ້າໝາຍ ຈຳນວນ 3 ກໍລະນີ ທີ່ 3 ບ້ານຄື: ບ້ານໂພນສະຫວ່າງເໜືອ, ບ້ານ ໂນນສະຫວາດ ແລະ ບ້ານສົ້ມປ່ອຍ. ສ່ວນຢູ່ພື້ນທີ່ແຂວງ ຫົວພັນ ພວກເຮົາຮ່ວມກັບທີມງານໂຄງການ ແລະ ຄູ່ຮ່ວມງານກໍໄດ້ລົງຕິດຕາມຢ້ຽມຢາມກຸ່ມເປົ້າໝາຍ 3 ກໍລະນີ ທີ່ 2 ບ້ານຄື: ບ້ານ ງິ້ວ ແລະ ບ້ານນາວຽງ.

ການຕິດຕາມ ແລະ ການປະສານງານ

ກອງປະຊຸມປະຈໍາປີ

ທີມງານໂຄງການຂອງພວກເຮົາໃນແຕ່ລະພື້ນທີ່ໄດ້ຈັດກອງປະຊຸມປະຈຳປີ 2021 ຂື້ນໃນເດືອນມັງກອນ 2022, ໂດຍມີຈຸດປະສົງເພື່ອລາຍງານຄວາມຄືບໜ້າຂອງກິດຈະກຳທີ່ໄດ້ຈັດຕັ້ງປະຕິບັດຜ່ານມາໃນປີທີ່ແລ້ວ ແລະ ເພື່ອນຳສະເໜີແຜນການຈັດຕັ້ງປະຕິບັດສຳລັບປີຕໍ່ໄປ. ເຊິ່ງແຕ່ລະພື້ນທີ່ມີຜູ້ເຂົ້າຮ່ວມຈາກ: ຄູ່ຮ່ວມງານຊີ້ນຳໂຄງການຂັ້ນນະຄອນ, ຂັ້ນແຂວງ, ຂັ້ນເມືອງ, ອົງການຈັດຕັ້ງຂັ້ນບ້ານ, ຜູ້ໃຫ້ທຶນ ແລະ ທີມງານໂຄງການ.

ກອງປະຊຸມປິດໂຄງການ

ວັນທີ 16 ເດືອນພະຈິກ, 2022 ນີ້ ກອງປະຊຸມທ້າຍໂຄງການຂອງໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົມ (AC5-CBID) ໄດ້ຈັດຂຶ້ນທີ່ໂຮງແຮມ Laotel, ໃນນະຄອນຫຼວງວຽງຈັນ. ກອງປະຊຸມດັ່ງກ່າວ ໄດ້ມີຜູ້ເຂົ້າຮ່ວມຈາກພາກລັດ ຈາກລະດັບສູງກາງ, ແຂວງ ແລະ ເມືອງ ເຂົ້າຮ່ວມ ປະກອບດ້ວຍ ກົມນະໂຍບາຍຕໍ່ຜູ້ມີ ຜົນງານ, ຄົນພິການ ແລະ ຜູ້ອາຍຸສູງ; ກົມຮ່ວມມືສາກົນ, ແລະ ກະຊວງແຮງງານ ແລະ ສະຫວັດດີການສັງຄົມ; ກົມປິ່ນປົວ ແລະ ຟື້ນຟູ ພາຍໃຕ້ກະຊວງສາທາລະນະສຸກ, ແລະ ກົມອາຊີວະສຶກສາ ແລະ ຝຶກອົບຮົມເຕັກນິກ-ວິຊາຊີບ (TVET) ພາຍໃຕ້ກະຊວງສຶກສາທິການ ແລະ ກິລາ, ສະມາຊິກທີມງານໂຄງການ ຂອງ HI ແລະ ຕົວແທນຈາກ ARMI. ສໍາລັບຄະນະຄຸ້ມຄອງການຈັດຕັ້ງປະຕິບັດໂຄງການຂັ້ນແຂວງ ແລະ ເມືອງ ຈາກແຂວງສະຫວັນນະເຂດ ແລະ ແຂວງຫົວພັນ ປະກອບດ້ວຍ ພະແນກແຮງງານ ແລະ ສະຫວັດດີການສັງຄົມແຂວງ; ຫ້ອງວ່າການແຂວງ; ພະແນກການຕ່າງປະເທດແຂວງ; ພະແນກສາທາລະນະສຸກ ແຂວງ; ພະແນກສຶກສາທິການ ແລະ ກິລາແຂວງ; ພະແນກແຜນການ ແລະ ການລົງທຶນແຂວງ; ແລະ ຂັ້ນເມືອງ ປະກອບມີ ຮອງເຈົ້າເມືອງໄກສອນພົມວິຫານ ແລະ ເມືອງຊຳ ເໜືອ, ຫ້ອງການແຮງງານ ແລະ ສະຫວັດດີການສັງຄົມເມືອງ; ຫ້ອງການສາທາລະນະສຸກເມືອງ ແລະ ຫ້ອງການສຶກສາທິການ ແລະ ກິລາເມືອງ.

ວຽກງານຟື້ນຟູໜ້າທີ່ການ ແລະ ການດຳເນີນກິດຈະກຳການສ້າງລາຍຮັບໄດ້ຮັບການປັບປຸງດີຂື້ນ

ພາກສ່ວນທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນຢູ່ 2 ແຂວງ ໄດ້ຮັບການສ້າງຄວາມອາດສາມາດ, ໄດ້ຮັບຄວາມຮູ້ທາງວິຊາການ ແລະ ເພີ່ມທັກສະ

ຄົນພິການໃນ 2 ແຂວງມີຄວາມພໍໃຈຕໍ່ກັບຄວາມຮັບຮູ້ທີ່ເພີ່ມຂື້ນ,ສາມາດເຂົ້າເຖິງການບໍລິການໃນການປັບປຸງຊີວິດການເປັນຢູ່ ແລະ ການຟື້ນຟູໜ້າທີ່ການ

ໂຄງການພັດທະນາການມີສ່ວນຮ່ວມໃນພື້ນຖານຂັ້ນຊຸມຊົນ

ການສົ່ງຕໍ່ອຸປະກອນຊ່ວຍ/ເຄື່ອງຄໍ້າຊູ

ໃນກິດຈະກຳການສົ່ງຕໍ່ອຸປະກອນຊ່ວຍເຫຼືອ ແລະ ເຄື່ອງຄ້ຳຊູ ພວກເຮົາໃນແຕ່ລະພື້ນທີ່ຮ່ວມກັບຄູ່ຮ່ວມງານທີ່ກ່ຽວຂ້ອງໄດ້ລົງສະໜັບສະໜູນ ແລະ ສະໜອງອຸປະກອນ, ມອບເຄື່ອງຄ້ຳຊູ ແລະ ແນະນຳວິທີການນຳໃຊ້ເຄື່ອງຄ້ຳຊູໃຫ້ກັບກຸ່ມເປົ້າໝາຍຫຼາຍພື້ນທີ່. ເຊິ່ງປະກອບມີ: ເຄື່ອງຊ່ວຍຟັງ, ຕັ່ງນັ່ງຖ່າຍໜັກ-ເບົາ, ຄອກຊ່ວຍຍ່າງເດັກ, ລໍ້ເລື່ອນ, ເສື່ອນອນລົມພ້ອມເຄື່ອງສູບ, ເກີບເສີມພື້ນ, ໄມ້ຄ້ຳ, ແວ່ນຕາ, ຂາທຽມ. ກິດຈະກຳດັ່ງກ່າວນີ້, ຈັດຂື້ນເພື່ອເປັນການອຳນວຍຄວາມສະດວກ ແລະ ຊຸກຍູ້ໃຫ້ກັບກຸ່ມເປົ້າໝາຍໄດ້ໃຊ້ຊີວິດທີ່ສະດວກສະບາຍຂື້ນ.

ການສົ່ງຕໍ່ຟື້ນຟູບໍາບັດໜ້າທີ່ການ

ອກຈາກພວກເຮົາຈະລົງສະໜອງເຄື່ອງຊ່ວຍເຫຼືອ ແລະ ອຸປະກອນຄ້ຳຊູໃຫ້ກຸ່ມເປົ້າໝາຍແລ້ວ, ພວກເຮົາກໍ່ໄດ້ສືບຕໍ່ລົງສົ່ງເສີມ ແລະ ຊຸກຍູ້ກຸ່ມເປົ້າໝາຍໃຫ້ເຂົາເຈົ້າໄດ້ເຂົ້າຮັບການບຳບັດ ແລະ ເຂົ້າຮັບການຮັກສາທີ່ສູນຟື້ນຟູທີ່ປະຈຳຢູ່ແຕ່ລະພື້ນທີ່ຄື: ສົ່ງຕໍ່ 1 ກໍລະນີ ທີ່ບ້ານໂພນສະຫວ່າງເໜືອເຂົ້າຮັບການຟື້ນຟູໜ້າທີ່ການທີ່ສາຂາສູນການແພດຟື້ນຟູໜ້າທີ່ການ ແຂວງສະຫວັນນະເຂດ, ສົ່ງຕໍ່ 2 ກໍລະນີ ຈາກບ້ານນາລິວ ແລະ ບ້ານໂພນສະຫວ່າງ ໄປຟື້ນຟູໜ້າທີ່ການທີ່ຂະແໜງກາຍະບຳບັດຂອງໂຮງໝໍແຂວງຫົວພັນ. ນອກຈາກນີ້, ທີມງານຍັງໄດ້ສົ່ງວິຊາການຈາກສາຂາສູນການແພດຟື້ນຟູ ແລະ ຜູ້ຊ່ຽວຊານຈາກອົງການເພື່ອມະນຸດສະທຳ ແລະ ການມີສ່ວນຮ່ວມ ໄດ້ແນະນຳໃຫ້ກຸ່ມເປົ້າໝາຍບຳບັດຢູ່ເຮືອນອີກ.

ໂຄງການຂະຫຍາຍໂຄງລ່າງນໍ້າສະອາດ ແລະ ໂພຊະນາການ

ເມືອງອາດສະພອນ, ເມືອງເຊໂປນ ແລະ ເມືອງນອງ, ແຂວງສະຫວັນນະເຂດ

ໂຄງການຂະຫຍາຍໂຄງລ່າງນ້ຳສະອາດ ແລະ ໂພຊະນາການ ແມ່ນໜຶ່ງໃນໂຄງການຂອງ ສະມາຄົມ ເພື່ອການສະໜັບສະໜູນ ແລະ ປັບປຸງຊົນນະບົດ (ສພປ) ທີ່ໄດ້ຈັດຕັ້ງປະຕິບັດຢູ່ 7 ໂຮງຮຽນເປົ້າໝາຍໃນ 3 ເມືອງທີ່ແຂວງ ສະຫວັນນະເຂດຄື: ເມືອງອາດສະພອນມີ ໂຮງຮຽນປະຖົມກາງຕີ້ວ, ໂຮງຮຽນປະຖົມກາງບອນ, ໂຮງຮຽນປະຖົມຕັບເຕົ່າ ແລະ ໂຮງຮຽນປະຖົມດົງຄຳກວນ; ເມືອງ ເຊໂປນມີ ໂຮງຮຽນປະຖົມສົມບູນເມືອງຈັນ ແລະ ເມືອງ ນອງມີ ໂຮງຮຽນປະຖົມສະດິ ແລະ ຫີນສະຫວ່າງ. ໂຄງການດັ່ງກ່າວໄດ້ຮັບທຶນຈາກ ສະຫະພາບເອີລົບ (EU), ມູນຄ່າ 60,000 ໂດລາສະຫະລັດ, ເຊິ່ງມີໄລຍະການຈັດຕັ້ງປະຕິບັດໂຄງການ ເລີ່ມຕັ້ງແຕ່ເດືອນ ພະຈິກ 2020 ຫາ ເດືອນ ທັນວາ 2021, ໂດຍໄດ້ມີການຮ່ວມມືກັບກະຊວງໂຍທາທິການ ແລະ ຂົນສົ່ງ ຕາງໜ້າໂດຍກົມນ້ຳປະປາ.

ອີງຕາມການເກັບຂໍ້ມູນເບື້ອງຕົ້ນກ່ອນການຈັດຕັ້ງປະຕິບັດໂຄງການເຫັນວ່າ ໂຮງຮຽນເປົ້າໝາຍຫຼາຍແຫ່ງແມ່ນຍັງບໍ່ມີການເອົາໃຈໃສ່ຢ່າງເຕັມທີ່ກັບວຽກງານການສົ່ງເສີມດ້ານສຸຂະພາບທີ່ດີໃນໂຮງຮຽນ, ເຮັດໃຫ້ນັກຮຽນບາງເຂດມັກມີຜົນກະທົບທາງດ້ານສຸຂະພາບຮ່າງກາຍ ຍ້ອນປ່ອຍປະລະເລີຍໃນການຮັກສາຄວາມສະອາດ. ດັ່ງນັ້ນ, ເພື່ອສ້າງຄວາມເຂັ້ມແຂງໃນການຮັກສາແຫຼ່ງນ້ຳ, ການສະໜອງລະບົບນ້ຳໃຊ້ ແລະ ປັບປຸງສຸຂະພິບານໃນໂຮງຮຽນ, ເພື່ອສ້າງແຜນງານການປູກຈິດສຳນຶກດ້ານນ້ຳ ແລະ ສຸຂະອະນາໄມໃຫ້ແກ່ ນັກຮຽນໃນໂຮງຮຽນ ແລະ ການສ້າງຄວາມອາດສາມາດ ໃຫ້ແກ່ຄູ ໃນການສອດແຊກກິດຈະກຳທັກສະຊີວິດ ໂດຍສະເພາະວິຊາ ວິທະຍາສາດສິ່ງແວດລ້ອມ ແລະ ວິຊາໂລກອ້ອມຕົວເຮົາ;ໂຄງການພວກເຮົາມີຄາດຄະເນຜົນຮັບຄື: ເພື່ອຮັບປະກັນໃຫ້ທຸກຄົນໃນກຸ່ມເປົ້າໝາຍໂຄງການ ໄດ້ເຂົ້າເຖິງການນຳໃຊ້ນ້ຳປະປາ ແລະ ສຸຂະພິບານ ທີ່ສະອາດ ແລະ ປອດໄພ. ຜູ້ໄດ້ຮັບຜົນປະໂຫຍດແມ່ນ ນັກຮຽນທັງໝົດໃນ 07 ໂຮງຮຽນເປົ້າໝາຍຂອງໂຄງການ.

ຂໍ້ມູນກ່ຽວກັບໂຄງການ

1. ກອງປະຊຸມແນະນຳໂຄງການ.

2. ສົ່ງເສີມສຸຂະພາບດີໃນໂຮງຮຽນ (ການລ້າງມື, ຖູແຂ້ວ ແລະ ກິນຢາຂ້າແມ່ທ້ອງ).

3. ສົ່ງເສີມໃຫ້ຄູສອດແຊກກິດຈະກຳທັກສະຊີວິດເຂົ້າໃນຫຼັກສູດການຮຽນການສອນທີ່ມີຢູ່ແລ້ວ.

4. ຝຶກອົບຮົມຄູ ກ່ຽວກັບ ການເປັນຄູຝຶກຂັ້ນໂຮງຮຽນ ເພື່ອກາຍເປັນໂຮງຮຽນ 3 ດາວ.

5. ການຈັດກິດໃນວັນສໍາຄັນຂອງໂຮງຮຽນ ເພື່ອໃຫ້ຄວາມຮູ້ດ້ານສຸຂະອະນາໄມ.

6. ການຕິດຕາມສະໜັບສະໜູນດ້ານເຕັກນິກວິຊາການ.

7. ການແຕ້ມຝາພະໜັງຫ້ອງນໍ້າ ທີ່ສື່ຄວາມໝາຍສົ່ງເສີມດ້ານສຸຂະອະນາໄມ.

8. ການໃຫ້ຄວາມຮູ້ວັນກິນຢາຂ້າແມ່ທ້ອງໃນໂຮງຮຽນ.

ໂຄງການຂະຫຍາຍໂຄງລ່າງນໍ້າສະອາດ ແລະ ໂພຊະນາການ ມີ 8 ກິດຈະກຳຫຼັກ

ພວກເຮົາໄດ້ຈັດກອງປະຊຸມປຶກສາຫາລືກັບຜູ້ບໍລິຫານລວມໄປເຖິງບັນດາຄູອາຈານຂອງໂຮງຮຽນເປົ້າໝາຍເພື່ອເປັນການແນະນຳກ່ຽວກັບຂໍ້ມູນຂອງໂຄງການໃຫ້ຄູອາຈານ ແລະ ບັນດາພໍ່ແມ່ປະຊາຊົນ ລວມໄປເຖິງບັນດານ້ອງໆນັກຮຽນໄດ້ຮັບຮູ້ ແລະ ເຂົ້າໃຈ ເພື່ອໃຫ້ໝາກຜົນຂອງໂຄງການບັນລຸຜົນຕາມເປົ້າໝາຍທີ່ວາງໄວ້. ເປັນຕົ້ນແມ່ນໃນກອງປະຊຸມໄດ້ຕົກລົງໃຫ້ຄູ-ອາຈານ ແລະ ນັກຮຽນຮ່ວມກັນເປັນເຈົ້າການປົກປັກຮັກສາສິ່ງອຳນວຍຄວາມສະດວກໃນໂຮງຮຽນ. ນອກຈາກນີ້, ພວກເຮົາຍັງໄດ້ມີການມອບອຸປະກອນໃຫ້ນັກຮຽນເຊັ່ນ: ອຸປະກອນອະນາໄມຄວາມສະອາດມີ ສະບູ, ຢາສີຟັນ ແລະ ອື່ນໆ.

ກອງປະຊຸມແນະນຳໂຄງການ

ເພື່ອເປັນການສົ່ງເສີມສຸຂະພາບໃຫ້ກັບກຸ່ມເປົ້າໝາຍແຕ່ລະໂຮງຮຽນໃຫ້ມີສຸຂະພາບທີ່ດີ, ພວກເຮົາໄດ້ຈັດຝຶກອົບຮົມ ໃຫ້ແກ່ບັນດາ ຄູ, ຄະນະພັດທະນາການສຶກສາຂັ້ນບ້ານ ແລະ ນັກຮຽນບາງກຸ່ມ ກ່ຽວກັບການລ້າງມືໃສ່ສະບູ 7 ຂັ້ນຕອນ, ໄດ້ມອບເພງ ແລະ ວິດີໂອໃຫ້ຄູຝຶກຊ້ອມໃຫ້ນັກຮຽນຟັງ ແລະ ເບິ່ງ ເພື່ອໃຫ້ຄູໄດ້ຮຽນຮູ້ ແລະ ສືບຕໍ່ນຳໄປສອນແກ່ນັກຮຽນ. ຫຼັງຈາກພວກເຮົາສຳເລັດການລົງຝຶກອົບຮົມໃຫ້ກຸ່ມເປົ້າໝາຍແລ້ວ ພວກເຮົາໄດ້ແນະນຳໃຫ້ຄູນຳພານັກຮຽນຈັດກິດຈະກຳລ້າງມືດ້ວຍສະບູ ແລະ ຖູແຂ້ວທຸກໆມື້ ເວລາພັກຜ່ອນ, ຫຼັງຈາກຫຼີ້ນເປື້ອນ ແລະ ກ່ອນກິນເຂົ້າທ່ຽງ. ພ້ອມກັນນີ້,ພວກເຮົາກໍໄດ້ຈັດກິດຈະກຳໃຫ້ຄວາມຮູ້ກ່ຽວກັບການກິນຢາຂ້າແມ່ທ້ອງ ໂດຍສົມທົບກັບວິຊາການຈາກຫ້ອງການສາທາລະນະສຸກເມືອງລົງອະທິບາຍໃຫ້ຄວາມຮູ້ຄວາມສຳຄັນ ແລະ ປະໂຫຍດຂອງການກິນຢາຂ້າແມ່ທ້ອງ ໂດຍໃຫ້ເບິ່ງຮູບພາບ, ໂພສເຕີ້ ແລະ ໃຫ້ນັກຮຽນແຕ້ມຮູບພາບກ່ຽວກັບແມ່ທ້ອງ.

ສົ່ງເສີມສຸຂະພາບທີ່ດີໃນໂຮງຮຽນ (ການລ້າງມື, ຖູແຂ້ວ ແລະ ກິນຢາຂ້າແມ່ທ້ອງ)

ເພື່ອເສີມສ້າງໃຫ້ຄູ ຮັບຮູ້, ເຂົ້າໃຈ ແລະ ມີທັກສະໃນການສອດແຊກກິດຈະກໍາເຂົ້າໃນຫຼັກສູດການຮຽນ-ການສອນ ພວກເຮົາໄດ້ລົງຈັດກິດຈະກຳຕ່າງໆເພື່ອສົ່ງເສີມທັກສະຂອງຄູໃຫ້ມີຄວາມຊຳນານຂື້ນ. ເປັນຕົ້ນແມ່ນ ສົ່ງເສີມໃຫ້ຄູໄດ້ສອດແຊກກິດຈະກຳເຂົ້າໃນວິຊາຕ່າງໆຄື: ວິຊາວິທະຍາສາດສິ່ງແວດລ້ອມຂອງຫ້ອງ ປ.1 ຮອດ ປ.3 ແລະ ວິຊາໂລກອ້ອມໂຕຂອງຫ້ອງ ປ.4 ແລະ ປ.5, ເຊິ່ງພວກເຮົາໄດ້ເນັ້ນການປະຕິບັດຫຼາຍກວ່າການເວົ້າເຊັ່ນ: ຫຼິ້ນເກມ, ເລົ່ານິທານ, ຮ້ອງເພງ, ແຕ້ມຮູບ, ສະແດງບົດບາດສົມມຸດ ແລະ ອື່ນໆ+ສອດຄ່ອງກັບຫົວບົດຂອງວິຊາສອນທີ່ກ່ຽວຂ້ອງກັບກະແຈ 6 ດອກຄື: ການລ້າງມືໃສ່ສະບູ, ການຖູແຂ້ວ, ການກິນຢາຂ້າແມ່ທ້ອງ, ການດື່ມນ້ຳທີ່ສະອາດ ແລະ ປອດໄພ, ການຮັກສາອະນາໄມສະພາບແວດລ້ອມ, ການຮັກສາອະນາໄມ ແລະ ນຳໃຊ້ວິດຖ່າຍ. ຈຸດປະສົງທີ່ພວກເຮົາຈັດກິດຈະກຳນີ້ກໍເພື່ອ ຫຼຸດຜ່ອນການຂາດຮຽນຂອງເດັກນັກຮຽນເພາະພວກເຂົາຈະໄດ້ຮຽນຮູ້ແບບມ່ວນຊື່ນ ແລະ ຈື່ຈຳງ່າຍ, ໂດຍຜ່ານການຮຽນຮູ້ແບບມ່ວນຊື່ນ ແລະ ການສຳພັດຕົວຈິງເປັນປະຈຳ ແລະ ຕໍ່ເນື່ອງ. ນອກຈາກນີ້ ເພື່ອນໍາສະເໜີໃຫ້ບັນດາຄູ, ຄະນະພັດທະນາການສຶກສາຂັ້ນບ້ານ ແລະ ນັກຮຽນໃຫ້ໄດ້ຮັບຮູ້ ແລະ ເຂົ້າໃຈກ່ຽວກັບກິດຈະກຳທັກສະຊີວິດ (ສຸຂະອະນາໄມໃນໂຮງຮຽນ) ແມ່ນມີຄວາມສຳຄັນຕໍ່ກັບຊີວິດການເປັນຢູ່ ແລະ ສຸຂະພາບຂອງໝົດທຸກຄົນໂດຍສະເພາະກໍແມ່ນນັກຮຽນ.

ສົ່ງເສີມໃຫ້ຄູສອນສອດແຊກກິດຈະກຳ ທັກສະຊີວິດເຂົ້າໃນຫຼັກສູດການຮຽນ-ການສອນທີ່ມີຢູ່ແລ້ວ

ເພື່ອປະຕິບັດຕາມບັນດາກິດຈະກຳຕ່າງໆທີ່ໂຄງການວາງໄວ້ ແລະ ໃຫ້ໂຮງຮຽນເປົ້າໝາຍໄດ້ກາຍເປັນໂຮງຮຽນ 3 ດາວ ພວກເຮົາໄດ້ເຊີນເອົາຄູຝຶກຈາກພະແນກສຶກສາທິການ ແລະ ກິລາແຂວງທີ່ມີປະສົບການສູງກ່ຽວກັບວຽກງານສ້າງຄວາມສາມາດຮ່ວມກັບກະຊວງສຶກສາທິການ ແລະ ກິລາຈັດກິດຈະກຳຂຶ້ນທີ່ເມືອງ ອາດສະພອນ ແລະ ເມືອງ ນອງ, ແຂວງ ສະຫວັນນະເຂດ. ເຊິ່ງການຈັດກິດຈະກຳດັ່ງກ່າວນີ້, ຈຸດປະສົງຫຼັກກໍ່ເພື່ອເປັນການຝຶກທັກສະໃຫ້ແກ່ຄູໃນແຕ່ລະໂຮງຮຽນໃຫ້ກາຍເປັນຄູຝຶກຂັ້ນໂຮງຮຽນ ທີ່ສາມາດສົ່ງຕໍ່ຄວາມຮູ້ໃຫ້ຄູຜູ້ອື່ນ, ສາມາດສົ່ງຕໍ່ຄວາມຮູ້ໃຫ້ກັບນັກຮຽນ ແລະ ເປັນຕົວຫຼັກໃນການນຳພາຄູ ແລະ ນັກຮຽນໃນການຈັດຕັ້ງປະຕິບັດກິດຈະກຳຕ່າງໆຂອງໂຄງການ.

ຝຶກອົບຮົມຄູກ່ຽວກັບການເປັນຄູຝຶກຂັ້ນໂຮງຮຽນເພື່ອກາຍເປັນໂຮງຮຽນ 3 ດາວ

ພວກເຮົາໄດ້ລົງຈັດຫຼາຍໆກິດຈະກຳເພື່ອສົ່ງເສີມວຽກງານດ້ານສຸຂະອະນາໄມເປັນຕົ້ນແມ່ນ: ຈັດກິດຈະກຳໃນວັນນ້ຳສາກົນ,ໃນວັນບໍລິຫານຈັດການຂີ້ເຫຍື້ອ ແລະ ວັນຫ້ອງນ້ຳສາກົນເປັນຕົ້ນ. ເຊິ່ງກິດຈະກຳເຫຼົ່ານີ້ພວກເຮົາໄດ້ຮ່ວມກັບຄູໃນໂຮງຮຽນເປົ້າໝາຍຂອງແຕ່ລະພື້ນທີ່ໂດຍໄດ້ຄັດເລືອກວິດີໂອທີ່ເໝາະສົມກັບນັກຮຽນເຊັ່ນ:ວິດີໂອການສົ່ງເສີມສຸຂະພາບທີ່ດີໃນໂຮງຮຽນ, ວີດີໂອກ່ຽວກັບທັກສະການສອດແຊກກິດຈະກຳເຂົ້າໃນຫຼັກສູດການຮຽນ-ການສອນ, ວີດີໂອເພງກ່ຽວກັບການສາທິດຂັ້ນຕອນການລ້າງມືເຊິ່ງພວກເຮົາໄດ້ເປີດວິດີໂອໃຫ້ຄູແລະນັກຮຽນເບິ່ງໃນເວລາຈັດກິດຈະກຳວັນພິເສດຕ່າງໆໃນໂຮງຮຽນ... ຜ່ານກິດຈະກຳນີ້ເຫັນວ່ານັກຮຽນ ແລະ ຄູມີຄວາມສົນໃຈຫຼາຍຂື້ນ ແລະ ສາມາດຈື່ຈຳງ່າຍກວ່າການໃຫ້ຄວາມຮູ້ແບບທິດສະດີຢ່າງດຽວ.

ການຈັດກິດຈະກຳວັນສໍາຄັນໃນໂຮງຮຽນເພື່ອໃຫ້ຄວາມຮູ້ດ້ານສຸຂະອະນາໄມ

ວຽກງານການຕິດຕາມ ແລະ ສະໜັບສະໜູນດ້ານເຕັກນິກວິຊາການ ພວກເຮົາກໍ່ໄດ້ລົງຕິດຕາມ ແລະ ລົງສະໜັບສະໜູນກິດຈະກຳຕ່າງໆທີ່ທາງໂຄງການ ແລະ ພາກສ່ວນທີ່ກ່ຽວຂ້ອງໄດ້ຈັດຂື້ນເຊັ່ນ: ກິດຈະກໍາການສົ່ງເສີມສຸຂະພາບດີໃນໂຮງຮຽນ, ກິດຈະກໍາທັກສະຊີວິດ ແລະ ກິດຈະກຳການປະຕິບັດມາດຕະຖານໂຮງຮຽນ 3 ດາວ... ເພື່ອເປັນການຝຶກການຈັດຕັ້ງປະຕິບັດໂຕຈິງໃນການສອດແຊກກິດຈະກໍາຂອງຄູແຕ່ລະຫ້ອງ ພວກເຮົາໄດ້ສົ່ງເສີມໃຫ້ບັນດາຄູໄດ້ເຂົ້າຮ່ວມຝຶກອົບຮົມໃນຫົວຂໍ້ຕ່າງໆດັ່ງກ່າວ. ຫຼັງຈາກທີ່ຄູເຂົ້າຮ່ວມຝຶກອົບຮົມແລ້ວ ຄູແຕ່ລະຄົນມີແຜນການສອນແຕ່ລະຫົວບົດທີ່ກ່ຽວຂ້ອງຂອງແຕ່ລະວິຊາ ເພື່ອການຈັດຕັ້ງປະຕິບັດໃນຄັ້ງຕໍ່ໄປ ກ່ຽວກັບການປະຕິບັດໂຕຈິງ. ໂດຍການປຶກສາຫາລືກັບຄູໃນການຈັດຕັ້ງປະຕິບັດກິດຈະກໍາໄລຍະຜ່ານມາ ສິ່ງທີ່ຄູໄດ້ພົບເວລາຈັດຕັ້ງປະຕິບັດຕົວຈິງ ເປັນຕົ້ນແມ່ນບັນດາຂໍ້ສະດວກ, ຂໍ້ຫຍຸ້ງຍາກ ແລະ ວິທີແກ້ໄຂຕ່າງໆ ທັງນີ້ເພື່ອຮູ້ຊ່ອງທາງວິທີການຊ່ວຍເຫຼືອຄູທີ່ເຫັນວ່າຍັງເຮັດບໍ່ໄດ້ດີ ແລະ ທັງເປັນການເສີມສ້າງຄູທີ່ເຮັດໄດ້ດີໃຫ້ຊ່ວຍໃນການແນະນຳຄູຜູ້ອື່ນໃນໂຮງຮຽນ ໃຫ້ໄດ້ຮັບການປັບປຸງພັດທະນາທັກສະການສອນໃຫ້ໄດ້ດີຂຶ້ນເທື່ອລະກ້າວ ແລະ ປະຕິບັດໄດ້ຕາມແຜນທີ່ວາງໄວ້.

ການຕິດຕາມສະໜັບສະໜູນດ້ານເຕັກນິກວິຊາການ

ເພື່ອເປັນການສົ່ງເສີມວຽກງານດ້ານສຸຂະອະນາໄມ, ພວກເຮົາໄດ້ມີການຈັດຕັ້ງປະຕິບັດກິດຈະກຳຫຼາຍຢ່າງ ໂດຍສະເພາະແມ່ນກິດຈະກຳການແຕ້ມຮູບ ພວກເຮົາໄດ້ສະໜັບສະໜູນໃຫ້ກຸ່ມເປົ້າໝາຍແຕ້ມຮູບທີ່ສື່ຄວາມໝາຍດ້ວຍການແຕ້ມໃສ່ເຈ້ຍ, ແຕ້ມໃສ່ຝາຜະໜັງ ກ່ຽວກັບຮູບຕ່າງໆເຊັ່ນ: ຮູບກ່ຽວກັບການຕິດຕໍ່ຂອງພະຍາດຈາກດິນຫາປາກ, ການນຳໃຊ້ຫ້ອງນ້ຳທີ່ຖືກວິທີ, ວິທີ ແລະ ຂັ້ນຕອນການລ້າງມືໃສ່ສະບູ, ລວມໄປເຖິງຮູບພາບກ່ຽວກັບແມ່ພະຍາດຕ່າງໆອີກດ້ວຍ. ເຊິ່ງກິດຈະກຳດັ່ງກ່າວ ພວກເຮົາໄດ້ຊຸກຍູ້ໃຫ້ຄູ ແລະ ນັກຮຽນມີສ່ວນຮ່ວມນຳກັນ. ຜ່ານການປຶກສາຫາລື ແລະ ເຫັນດີຈາກພາກສ່ວນທີ່ກ່ຽວຂ້ອງແລ້ວ ພວກເຮົາກໍ່ໄດ້ຈັດແຈງໃຫ້ແຕ່ລະຊັ້ນຮຽນແຕ້ມຮູບດັ່ງນີ້: ຊັ້ນຫ້ອງ ປ.ກຽມ-ປ.2 ແຕ້ມຮູບກ່ຽວກັບແມ່ທ້ອງ ຫຼື ພະຍາດ, ຫ້ອງ ປ.3 ແຕ້ມຮູບກ່ຽວກັບການລ້າງມືໃສ່ສະບູ 7 ຂັ້ນຕອນ, ສ່ວນຫ້ອງ ປ.4 ແຕ້ມຮູບ 5 ຂັ້ນຕອນການນຳໃຊ້ຫ້ອງນ້ຳທີ່ຖືກວິທີ ແລະ ຫ້ອງ ປ.5 ແຕ້ມຮູບກ່ຽວກັບຊ່ອງທາງການຕິດຕໍ່ຂອງພະຍາດຈາກດິນຫາປາກ. ເຊິ່ງພາຍຫຼັງນັກຮຽນແຕ້ມຮູບແລ້ວໄດ້ມີການຄັດເລືອກຮູບທີ່ດີທີ່ສຸດຂອງແຕ່ລະຫ້ອງ ໂດຍການເຫັນດີເປັນເອກະພາບຂອງນ້ອງນັກຮຽນ, ຄູ ແລະ ພວກເຮົາໄດ້ນຳໄປອັດແຂງແລ້ວສົ່ງໃຫ້ນ້ອງນັກຮຽນນຳໄປຕິດຢູ່ໃນຫ້ອງຮຽນຂອງໃຜລາວ.

ການແຕ້ມຮູບໃສ່ເຈ້ຍ A4 ແລະ A0 ທີ່ສື່ຄວາມໝາຍສົ່ງເສີມດ້ານສຸຂະອະນາໄມ

ນອກຈາກພວກເຮົາຈະລົງຈັດຕັ້ງປະຕິບັດກິດຈະກຳນຳພານັກຮຽນແຕ້ມຮູບພາບໃຫ້ຄວາມຮູ້ກ່ຽວກັບການຮັກສາສຸຂະອະນາໄມແລ້ວ, ພວກເຮົາຍັງໄດ້ສືບຕໍ່ລົງຈັດຕັ້ງປະຕິບັດກິດຈະກຳໃຫ້ຄວາມຮູ້ກ່ຽວກັບດ້ານສຸຂະອະນາໄມອີກດ້ວຍ ເຊິ່ງພວກເຮົາໄດ້ຮ່ວມມືກັບຄູນຳພານັກຮຽນຫຼິ້ນກິດຈະກຳທີ່ເຊື່ອມໂຍງກ່ຽວກັບການຮັກສາອະນາໄມຮ່າງກາຍ, ການນໍາໃຊ້ວິດຖ່າຍ ແລະ ການກິນຢາຂ້າແມ່ທ້ອງເພື່ອເປັນການຮຽນຮູ້ຜ່ານກິດຈະກຳຂອງນ້ອງນັກຮຽນໃຫ້ມີຄວາມຈື່ຈຳ ແລະ ເຂົ້າໃຈຢ່າງເລິກເຊິ່ງຫຼາຍຂຶ້ນ. ໂດຍກ່ອນການຫຼິ້ນເກມແຕ່ລະເກມທີມງານພວກເຮົາໄດ້ອະທິບາຍໃຫ້ຄວາມຮູ້ ແລະ ໃຫ້ເຫັນເຖິງຄວາມສຳຄັນຂອງເກມ ແລະ ອະທິບາຍວິທີການຫຼິ້ນເກມ. ພາຍຫຼັງສິ້ນສຸດການຫຼິ້ນເກມແລ້ວໄດ້ອະທິບາຍເຖິງຄວາມໝາຍຂອງແຕ່ລະເກມວ່າມີຄວາມກ່ຽວຂ້ອງກັບການຮັກສາອະນາໄມຮ່າງກາຍແນວໃດເປັນຕົ້ນແມ່ນ ການນໍາໃຊ້ຫ້ອງນໍ້າ, ເສັ້ນທາງການຕິດຕໍ່ພະຍາດຈາກດິນສູ່ປາກ, ການລ້າງມືໃສ່ສະບູທຸກຄັ້ງຫຼັງຈັບບາຍສິ່ງເປີເປື້ອນ ແລະ ການກິນຢາຂ້າແມ່ທ້ອງເພື່ອໃຫ້ນັກຮຽນເຫັນຄວາມສຳຄັນຂອງການນໍາໃຊ້ວິດຖ່າຍ ແລະ ການກີນຢາຂ້າແມ່ທ້ອງ.

ການໃຫ້ຄວາມຮູ້ວັນກິນຢາຂ້າແມ່ທ້ອງໃນໂຮງຮຽນ

ຜ່ານການຈັດຕັ້ງປະຕິບັດກິດຈະກຳຂອງໂຄງການ, ພວກເຮົາສາມາດສັງລວມຜົນໄດ້ຮັບວ່າທຸກຄົນໃນກຸ່ມເປົ້າໝາຍ ສາມາດເຂົ້າເຖິງການນຳໃຊ້ນ້ຳປະປາ ແລະ ສຸຂະພິບານທີ່ສະອາດ ແລະ ປອດໄພໄດ້ເຊິ່ງລາຍລະອຽດຕ່າງໆມີດັ່ງນີ້:

ຄູສອນໃນ 7 ໂຮງຮຽນສາມາດເຂົ້າໃຈເຖິງຄວາມສຳຄັນຂອງການສອດແຊກກິດຈະກຳ ທັກສະຊີວິດທີ່ກ່ຽວຂ້ອງກັບຫົວບົດການສອນ ໂດຍໃຫ້ກ່ຽວພັນກັບ 6 ຫຼັກສຸຂະອະນາໄມ. ຄູສອນມີຄວາມຮູ້ ໃນການສ້າງໃຫ້ນັກຮຽນຮຽນຮູ້ແບບມ່ວນຊື່ນ ແລະ ຈື່ຈຳງ່າຍຈາກການຝຶກອົບຮົມ, ຈັດກິດຈະກຳວັນພິເສດໃນໂຮງຮຽນ ແລະ ການຕິດຕາມສະໜັບສະໜູນຂອງທີມງານໂຄງການ ແລະ ຫ້ອງການສຶກສາທິການ ແລະ ກິລາເມືອງ.

ຊຸມຊົນໄດ້ຮຽນຮູ້ເຖິງການມີສ່ວນຮ່ວມກັບໂຮງຮຽນໃນການປະກອບສ່ວນວັດຖຸ ແລະ ການປຸກລະດົມຊຸມຊົນ ເພື່ອປະຕິບັດກິດຈະກຳຕ່າງໆໃນໂຮງຮຽນທີ່ກ່ຽວຂ້ອງເພື່ອພັດທະນາຄຸນະພາບການສຶກສາໃນໂຮງຮຽນຂອງຕົນໃຫ້ບັນລຸຕາມມາດຕະຖານ 3 ດາວຂອງກະຊວງສຶກສາທິການ ແລະ ກິລາ.

ນັກຮຽນໃນໂຮງຮຽນເປົ້າໝາຍເຂົ້າໃຈ ແລະ ສາມາດຈັດຕັ້ງປະຕິບັດການລ້າງມືໃສ່ສະບູ່ 7 ຂັ້ນຕອນ ແລະ ການຖູແຂ້ວທີ່ຖືກວິທີ, ມີຄວາມຮັບຮູ້ ແລະ ເຂົ້າໃຈຄວາມສຳຄັນຂອງການກິນຢາຂ້າແມ່ທ້ອງ, ການຮັກສາອະນາໄມສະພາບແວດລ້ອມ, ການນຳໃຊ້ຮັກສາອະນາໄມວິດຖ່າຍ ແລະ ການດື່ມນ້ຳທີ່ສະອາດ ແລະ ປອດໄພ.

ທັງ 7 ໂຮງຮຽນເປົ້າໝາຍສາມາດໄດ້ດາວເພີ່ມ 1 -2 ດາວ (ແຕ່ກ່ອນບໍ່ມີໂຮງຮຽນໃດໄດ້ດາວເທື່ອ) ໂດຍການປະເມີນຈາກໃບປະເມີນມາດຕະຖານການສຶກສາຂອງກະຊວງສຶກສາທິການ ແລະ ກິລາ.

ຜົນໄດ້ຮັບ

ໂຄງການເພື່ອຜ່ອນຜັນ, ຕອບໂຕ້, ປ້ອງກັນ ແລະ ຄວບຄຸມ

ການແຜ່ລະບາດຂອງພະຍາດ COVID-19

ເມືອງຈອມເພັດ, ເມືອງປາກອູ ແລະ ເມືອງຊຽງເງິນ ແຂວງຫຼວງພະບາງ

ໂຄງການເພື່ອຜ່ອນຜັນ, ຕອບໂຕ້, ປ້ອງກັນ ແລະ ຄວບຄຸມການແຜ່ລະບາດຂອງພະຍາດ COVID-19 ຢູ່ແຂວງ ຫຼວງພະບາງ ແມ່ນໜຶ່ງໃນໂຄງການຂອງ ສະມາຄົມ ເພື່ອການສະໜັບສະໜູນ ແລະ ປັບປຸງຊົນນະບົດ (ສພປ) ທີ່ໄດ້ຈັດຕັ້ງປະຕິບັດຢູ່ເມືອງ ຈອມເພັດ, ເມືອງ ປາກອູ ແລະ ເມືອງ ຊຽງເງິນ, ແຂວງ ຫຼວງພະບາງ. ໂຄງການດັ່ງກ່າວໄດ້ຮັບທຶນຈາກ ສະຖານທູດນິວຊີແລນ ປະຈຳບາງກອກ ປະເທດໄທ, ມູນຄ່າ 17,800 ໂດລາສະຫະລັດ, ເຊິ່ງມີໄລຍະການຈັດຕັ້ງປະຕິບັດໂຄງການແມ່ນ ເດືອນ ສິງຫາ 2021 - ພຶດສະພາ 2022, ໂດຍໄດ້ມີການຮ່ວມມືກັບ ພະແນກແຮງງານ ແລະ ສະຫວັດດີການສັງຄົມແຂວງ ຫຼວງພະບາງ. ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງພະຍາດ COVID-19, ເຮັດໃຫ້ຈໍານວນຜູ້ຕິດເຊື້ອພະຍາດ COVID-19 ເພີ່ມຂຶ້ນຢ່າງໄວວາ. ມີມາດຕະການປ້ອງກັນຢ່າງເຂັ້ມງວດ, ຫຼາຍສະຖານທີ່ໄດ້ປິດຊົ່ວຄາວ ແລະ ປະຊາຊົນຢູ່ແຕ່ໃນບ້ານ, ເຮັດໃຫ້ປະຊາຊົນຫຼາຍຄົນບໍ່ມີວຽກເຮັດງານທຳ ແລະ ຂາດລາຍຮັບເຂົ້າສູ່ຄອບຄົວ. ດັ່ງນັ້ນ, ຈື່ງໄດ້ມີໂຄງການນີ້ຂື້ນມາ ເພື່ອເປັນສ່ວນໜື່ງໃນການສະໜັບສະໜູນປ້ອງກັນການແຜ່ລະບາດ ແລະ ຜ່ອນຜັນຜົນກະທົບທາງເສດຖະກິດທີ່ເກີດຂຶ້ນຈາກການລະບາດຂອງພະຍາດ COVID-19. ຜູ້ໄດ້ຮັບຜົນປະໂຫຍດຫຼັກແມ່ນຄອບຄົວຜູ້ທຸກຍາກ (ໂດຍສະເພາະແມ່ນຜູ້ດ້ອຍໂອກາດ ແລະ ຄົນພິການ) ຢູ່ 3 ເມືອງຄື: ເມືອງ ຈອມເພັດ, ເມືອງ ປາກອູ ແລະ ເມືອງ ຊຽງເງິນ, ແຂວງ ຫຼວງພະບາງ. ໂຄງການມີຄາດຄະເນຜົນຮັບໄວ້ດັ່ງນີ້:

ຂໍ້ມູນຂອງຄົນພິການ, ຄົນທີ່ດ້ອຍໂອກາດ ຫຼື ຜູ້ທຸກຍາກ ໃນ 3 ເມືອງຈະໄດ້ເກັບກຳ ແລະ ບັນທຶກໃສ່ຖານຂໍ້ມູນຂອງໂຄງການ.
ຄອບຄົວທຸກຍາກ (ຄົນດ້ອຍໂອກາດ ແລະ ຄົນພິການ) ຈຳນວນ 300 ຄອບຄົວ ຈາກ 3 ເມືອງ ຈະໄດ້ຮັບເຄື່ອງມື, ອຸປະກອນປ້ອງກັນທີ່ຈໍາເປັນ, ເຄື່ອງອຸປະໂພກ-ບໍລິໂພກ ເພື່ອເຮັດໃຫ້ຄອບຄົວຂອງເຂົາເຈົ້າຫຼຸດຜ່ອນຄວາມສ່ຽງຕໍ່ການຕິດເຊື້ອພະຍາດ COVID-19 ແລະ ປອດໄພຫຼາຍຂຶ້ນ.
ຈະມີສື່ໂຄສະນາກ່ຽວກັບພະຍາດໂຄວິດ 19 ເຊັ່ນ: ໂພດສເຕີ, ສຽງບັນທຶກ ແລະ ວິດີໂອ ເປັນ 3 ພາສາ (ພາສາລາວ, ກຶມມຸ ແລະ ມົ້ງ) ເພື່ອໃຫ້ຄວາມຮູ້ກ່ຽວກັບສາເຫດ, ຜົນກະທົບ, ການປ້ອງກັນ ແລະ ສິດທິກັບຜູ້ທີ່ຕິດເຊື້ອພະຍາດ COVID-19.
ກຸ່ມເປົ້າໝາຍສາມາດເຂົ້າເຖິງແຫຼ່ງຂໍ້ມູນທີ່ໜ້າເຊື່ອຖື, ງ່າຍດາຍ, ວ່ອງໄວ, ທັນເຫດການ ແລະ ມີຄວາມປອດໄພຈາກການແຜ່ລະບາດຂອງພະຍາດ COVID-19.

ຂໍ້ມູນກ່ຽວກັບ ໂຄງການ

ໃຫ້ຄວາມຮູ້ກ່ຽວກັບບັນດາສາເຫດ, ການປ້ອງກັນ ແລະ ຜົນກະທົບຂອງພະຍາດໂຄວິດCOVID-19 ຜ່ານສື່ໂຄສະນາ
ສະໜອງອຸປະກອນ, ເຄື່ອງມື ແລະ ເຄື່ອງອຸປະໂພກ ບໍລິໂພກທີ່ຈຳເປັນໃຫ້ແກ່ຊຸມຊົນ ໂດຍສະເພາະແມ່ນຄອບຄົວທຸກຍາກດ້ອຍໂອກາດ ແລະ ຄົນພິການ
ໂຄສະນາເຜີຍແຜ່ຂໍ້ມູນເພື່ອສ້າງຄວາມຮັບຮູ້ ແລະ ເຂົ້າໃຈກ່ຽວກັບສິດທິ
ຝຶກອົບຮົມໃຫ້ຄວາມຮູ້ໃຫ້ແກ່ໂຮງໝໍນ້ອຍ ແລະ ອາສາສະໝັກຂັ້ນບ້ານ
ສະໜອງເຄື່ອງມື ແລະ ອຸປະກອນປ້ອງກັນທີ່ຈໍາເປັນໃຫ້ແກ່ແພດໝໍ
ສະໜອງເຄື່ອງມື ແລະ ອຸປະກອນປ້ອງກັນທີ່ຈຳເປັນໃຫ້ແກ່ຊຸມຊົນ ແລະ ໜ່ວຍສະເພາະກິດຂັ້ນທ້ອງຖິ່ນ

ໂຄງການເພື່ອຜ່ອນຜັນ, ຕອບໂຕ້, ປ້ອງກັນ ແລະ ຄວບຄຸມ ການແຜ່ລະບາດຂອງພະຍາດ COVID-19

ມີທັງໝົດ 6 ກິດຈະກຳຫຼັກ

ພວກເຮົາໄດ້ຈັດກິດຈະກຳການແຂ່ງຂັນສ້າງບົດລະຄອນສັ້ນ ພາຍໃຕ້ຫົວຂໍ້ທີ່ວ່າ: ສາເຫດ, ຜົນກະທົບ ແລະ ການປ້ອງກັນພະຍາດໂຄວິດ19. ກິດຈະກຳນີ້ມີຫຼາຍພາກສ່ວນໃຫ້ຄວາມສົນໃຈ ແລະ ສົ່ງບົດເຂົ້າມາຫຼາຍພໍສົມຄວນ. ຫຼັງຈາກຮອດກຳນົດມື້ແລ້ວ ພວກເຮົາໄດ້ມີການຄັດເລືອກເອົາບົດທີ່ເໝາະສົມທີ່ສຸດ ນັ້ນກໍ່ຄື: “ເລື່ອງຄິດໃຫ້ດີ ຊີວິດປອດໄພ ຫ່າງໄກຈາກໂຄວິດ-19”.

ເປັນຜົນງານການຂຽນຂອງນາງ ເມົ້າແອ ຊີເຮີ ນັກສຶກສາຈາກວິທະຍາໄລກະສິກຳ ແລະ ປ່າໄມ້ພາກເໜືອ ຮ່ວມກັບ ອາຈານ ຈັນທະພອນ, ອາຈານ ສີສະຫວາດ ຈາກວິທະຍາໄລກະສິກຳ ແລະ ປ່າໄມ້ພາກເໜືອ. ເຊິ່ງພວກເຮົາກໍ່ໄດ້ມີການກະກຽມ ແລະ ວາງແຜນໃນການຖ່າຍທຳລະຄອນສັ້ນເລື່ອງດັ່ງກ່າວໃຫ້ສຳເລັດ ແລະ ເຜີຍແຜ່ອອກສູ່ສັງຄົມ.

ກິດຈະກຳໃຫ້ຄວາມຮູ້ກ່ຽວກັບບັນດາສາເຫດ, ການປ້ອງກັນ ແລະ ຜົນກະທົບຂອງ COVID-19 ຜ່ານສື່ໂຄສະນາ

ຈາກການລົງເກັບກຳຂໍ້ມູນຂອງທີມງານໂຄງການກ່ອນການລົງຈັດຕັ້ງປະຕິບັດກິດຈະກຳເຫັນວ່າ ກຸ່ມເປົ້າໝາຍຫຼາຍຄອບຄົວ 30 ບ້ານ ໃນ 3 ເມືອງ ຍັງມີຄວາມຫຍຸ້ງຍາກ ແລະ ຕ້ອງການເຄື່ອງໃຊ້ຈຳເປັນຫຼາຍຢ່າງໃນຊີວິດປະຈຳວັນ. ໂດຍສະເພາະແມ່ນຄອບຄົວຜູ້ທຸກຍາກ, ຜູ້ພິການ ແລະ ຜູ້ທີ່ດ້ອຍໂອກາດ. ສະນັ້ນ, ພວກເຮົາຈຶ່ງໄດ້ຈັດຕັ້ງກິດຈະກຳມອບເຄື່ອງທີ່ຈຳເປັນໃຫ້ແກ່ຊຸມຊົນກຸ່ມເປົ້າໝາຍໃນຊ່ວງວິກິດພະຍາດໂຄວິດ 19 ລະບາດ ຈຳນວນ 392 ຄອບຄົວ ເຊິ່ງປະກອບມີ: ລົງສະໜອງເຄື່ອງອຸປະໂພກ-ບໍລິໂພກ, ອຸປະກອນເຄື່ອງໃຊ້, ອຸປະກອນເຄື່ອງມືປ້ອງກັນປະກອບດ້ວຍ: ຜ້າອັດປາກ, ສະບູ, ເຂົ້າສານ, ໝີ່, ໄຂ່ເປັດ, ປ່ອງປາ, ນ້ຳມັນພືດ ແລະ ເກືອ.

ສະໜອງອຸປະກອນ, ເຄື່ອງມື ແລະ ເຄື່ອງອຸປະໂພກ-ບໍລິໂພກທີ່ຈຳເປັນໃຫ້ແກ່ຊຸມຊົນ ໂດຍສະເພາະແມ່ນຄອບຄົວທຸກຍາກ (ຄົນດ້ອຍໂອກາດ ແລະ ຄົນພິການ)

ໃນລະຫວ່າງ ວັນທີ່ 23-25 ພຶດສະພາ 2022, ທີ່ເມືອງ ຈອມເພັດ, ເມືອງ ປາກອູ ແລະ ເມືອງ ຊຽງເງິນ ທີມງານໂຄງການຮ່ວມກັບ ພະແນກ ແຮງງານ ແລະ ສະຫວັດດີການສັງຄົມ ແຂວງ ຫຼວງພະບາງ ໄດ້ຈັດຝຶກອົບຮົມການຝຶກອົບຮົມ ການເຝົ້າລະວັງຕາມເຫດການຢູ່ຊຸມຊົນ, ການຕິດຕາມປິ່ນປົວຜູ້ຕິດເຊື້ອ COVID-19 ຢູ່ເຮືອນ, ວິທີການກວດຫາເຊື້ອ COVID-19 ດ້ວຍເຄື່ອງກວດແບບໄວ (ATK) ແລະ ການລົງທະບຽນ ທາງອອນລາຍຂອງຜູ້ຕິດເຊື້ອ COVID-19 ໃຫ້ແກ່ໂຮງໝໍນ້ອຍ ແລະ ອາສາສະໝັກຂັ້ນບ້ານ ຈາກ 3 ເມືອງເປົ້າໝາຍຂອງໂຄງການ ເພື່ອປົກປ້ອງສຸຂະພາບ ແລະ ຄຸ້ມຄອງກໍລະນີກໍລະນີຕິດເຊື້ອພະຍາດໂຄວິດ-19 ແລະ ພະຍາດອື່ນໆໃນຊຸມຊົນ, ຄົ້ນຫາ ຄົນທີ່ຖືກສົງໄສເປັນພະຍາດໂຄວິດ-19 ຫຼື ເຫດການອື່ນໆ ທີ່ຜິດປົກະຕິ ຢູ່ຊຸມຊົນເພື່ອປະຕິບັດມາດຕະການຕອບໂຕ້ໄວ,

ໃຫ້ຊຸມຊົນຊ່ວຍຕິດຕາມ ແລະ ລາຍງານ ສຸຂະພາບ ຂອງຄົນເຈັບທີ່ເປັນພະຍາດໂຄວິດ-19 ໃນແຕ່ລະວັນໃຫ້ແພດປິ່ນປົວ ແລະ ໃຫ້ຮູ້ຈັກວິທາການກວດຫາເຊື້ອ ພະຍາດໂຄວິດ-19 ດ້ວຍຕົນເອງ ແລະ ລາຍງານຜູ້ຕິດເຊື້ອໂຄວິດ-19 ທາງອອນລາຍ ເພື່ອເຮັດໃຫ້ແພດໝໍ ແລະ ອາສາສະໝັກຂັ້ນບ້ານມີຄວາມກຽມພ້ອມ ແລະ ຈັດຕັ້ງປະຕິບັດແຜນ ເພື່ອສະກັດກັ້ນ, ຄວບຄຸມ ແລະ ປ້ອງກັນພະຍາດ COVID-19. ຫຼັງຈາກແພດໝໍ ແລະ ອາສາສະໝັກຂັ້ນບ້ານໄດ້ຮັບການຝຶກອົບຮົມແລ້ວ ເຂົາເຈົ້າຈະເປັນຄົນສຳຄັນເພື່ອໃຫ້ຄວາມຮູ້ ແລະ ເຜີຍແຜ່ຂໍ້ມູນກ່ຽວກັບ COVID-19 ໃຫ້ແກ່ຊຸມຊົນ, ເຮັດໃຫ້ຊຸມຊົນສາມາດເຂົ້າເຖິງແຫຼ່ງຂໍ້ມູນທີ່ໜ້າເຊື່ອຖືໄດ້ຫຼາຍຂຶ້ນ ແລະ ມີສະຕິຫຼາຍຂຶ້ນ ເຊິ່ງມີຜູ້ເຂົ້້າຮ່ວມທັງໝົດ 59 ທ່ານ, ຍິງ 25 ທ່ານ.

ກິດຈະກຳໃຫ້ຄວາມຮູ້ ຫຼື ຝຶກອົບຮົມໃຫ້ແກ່ໂຮງໝໍນ້ອຍ ແລະ ອາສາສະໝັກຂັ້ນບ້ານ

ເພື່ອເປັນການສ້າງຂວັນກຳລັງໃຈ ແລະ ປະກອບສ່ວນໃນການຊ່ວຍເຫຼືອທີມງານແພດໝໍ ພວກເຮົາຮ່ວມກັບພະແນກ ແຮງງານ ແລະ ສະຫວັດດີການສັງຄົມແຂວງ ຫຼວງພະບາງ ໄດ້ລົງຈັດຕັ້ງປະຕິບັດກິດຈະກຳສະໜອງເຄື່ອງມື ແລະ ອຸປະກອນປ້ອງກັນທີ່ຈໍາເປັນໃຫ້ແກ່ພາກສ່ວນຕ່າງໆ ເຊັ່ນ: ໂຮງໝໍແຂວງ ຫຼວງພະບາງ, ໂຮງໝໍ 107, ໂຮງໝໍເມືອງ ຈອມເພັດ, ໂຮງໝໍເມືອງ ປາກອູ, ໂຮງໝໍເມືອງ ຊຽງເງິນ. ເຊິ່ງເຄື່ອງມື ແລະ ອຸປະກອນປ້ອງກັນທີ່ຈຳເປັນທີ່ມອບໃຫ້ນັ້ນ ປະກອບມີ: ຊຸດປ້ອງກັນພະຍາດໂຄວິດ19, ຖົງມືແພດ, ຜ້າອັດປາກ ແລະ ນ້ຳຢາລ້າງມື. ໂດຍມີຈຸດປະສົງເພື່ອໃຫ້ແກ່ແພດໝໍທີ່ປະຕິບັດໜ້າທີ່ ເພື່ອສະກັດກັ້ນ, ຄວບຄຸມ ແລະ ປ້ອງກັນພະຍາດ COVID-19 ເເລະ ເຮັດໃຫ້ເຂົາເຈົ້າປະຕິບັດໜ້າທີ່ຢ່າງເຕັມສ່ວນ ແລະ ປອດໄພຂຶ້ນ.

ສະໜອງເຄື່ອງມື ແລະ ອຸປະກອນປ້ອງກັນທີ່ຈໍາເປັນໃຫ້ແກ່ແພດໝໍ

ບໍ່ພຽງແຕ່ສະໜອງໃຫ້ກັບແພດໝໍເທົ່ານັ້ນ, ຕໍ່ມາພວກເຮົາຍັງໄດ້ສືບຕໍ່ຈັດຕັ້ງປະຕິບັດກິດຈະກຳສະໜອງເຄື່ອງມື ແລະ ອຸປະກອນປ້ອງກັນທີ່ຈຳເປັນໃຫ້ແກ່ຊຸມຊົນ ແລະ ໜ່ວຍສະເພາະກິດຂັ້ນທ້ອງຖິ່ນ ເຊັ່ນ: ໜ່ວຍກູ້ໄພກາແດງ, ໜ່ວຍສະເພາະກິດເມືອງ ຈອມເພັດ, ໜ່ວຍສະເພາະກິດເມືອງ ປາກອູ ແລະ ໜ່ວຍສະເພາະກິດເມືອງ ຊຽງເງິນ. ໂດຍມີຈຸດປະສົງເພື່ອສ້າງສິ່ງແວດລ້ອມໃນການເຮັດວຽກທີ່ປອດໄພຂຶ້ນ, ຊ່ວຍຫຼຸດຜ່ອນຄວາມສ່ຽງຕໍ່ການຕິດເຊື້ອພະຍາດໃຫ້ແກ່ໜ່ວຍກູ້ໄພ ແລະ ໜ່ວຍສະເພາະກິດຂັ້ນທ້ອງຖິ່ນທີ່ປະຕິບັດໜ້າທີ່ ເພື່ອສະກັດກັ້ນ, ຄວບຄຸມ ແລະ ປ້ອງກັນພະຍາດ COVID-19 ເເລະ ເຮັດໃຫ້ເຂົາເຈົ້າປະຕິບັດໜ້າທີ່ຢ່າງເຕັມສ່ວນ ແລະ ປອດໄພຫຼາຍຂຶ້ນ.

ກິດຈະກຳສະໜອງເຄື່ອງມື ແລະ ອຸປະກອນປ້ອງກັນທີ່ຈຳເປັນໃຫ້ແກ່ຊຸມຊົນ ແລະ ໜ່ວຍສະເພາະກິດຂັ້ນທ້ອງຖິ່ນ

ເພື່ອເປັນການສືບຕໍ່ວຽກງານການໂຄສະນາເຜີຍແຜ່ຂໍ້ມູນດ້ວຍຮູບແບບວີດີໂອທີ່ພວກເຮົາໄດ້ຈັດຕັ້ງປະຕິບັດຜ່ານມາ, ໂດຍການຄັດເລືອກເອົາບົດລະຄອນເລື່ອງສັ້ນເພື່ອຖ່າຍທຳເປັນຮູບແບບວີດີໂອ, ຕໍ່ມາພວກເຮົາຮ່ວມກັບທີມງານຖ່າຍທຳໄດ້ເລີ່ມລົງຈັດຕັ້ງປະຕິບັດຖ່າຍທຳວີດີໂອຕາມບົດເລື່ອງທີ່ໄດ້ຄັດເລືອກມາ ໂດຍດຳເນີນຖ່າຍທຳໄປຕາມເນື້ອເລື່ອງຂອງບົດລະຄອນ, ເຊິ່ງກຳນົດສະຖານທີ່ໃນການຖ່າຍທຳແມ່ນໃນຂອບເຂດແຂວງ ຫຼວງພະບາງຄື: ວັດຊຽງທອງ, ພະລາຊະວັງ, ຕາດກວາງຊີ, ຮ້ານອາຫານ... ການຖ່າຍທຳແມ່ນດຳເນີນໄປປະມານ 10 ວັນ ແລະ ທີມງານໄດ້ນຳເອົາວີດີໂອໄປຕັດຕໍ່ເປັນສະບັບທີ່ສົມບູນ. ເຊິ່ງພວກເຮົາຈະໄດ້ນຳໄປເຜີຍແຜ່ອອກໃຫ້ສັງຄົມໄດ້ຮັບຮູ້ ແລະ ເຂົ້າໃຈກ່ຽວບັນດາສາເຫດ, ຜົນກະທົບ ແລະ ການປ້ອງກັນພະຍາດໂຄວິດ-19 ຢ່າງທົ່ວເຖິງຜ່ານຊ່ອງທາງໂທລະພາບ ແລະ ວິທະຍຸກະຈາຍສຽງ.

ກິດຈະກຳໂຄສະນາເຜີຍແຜ່ຂໍ້ມູນ ເພື່ອສ້າງຄວາມຮັບຮູ້ ແລະ ເຂົ້າໃຈກ່ຽວກັບສິດທິ

ກິດຈະກຳໃນຄັ້ງນີ້ແມ່ນຈັດເພື່ອມອບລາງວັນໃຫ້ທີມງານນັກສະແດງລະຄອນເລື່ອງສັ້ນທີ່ຜະລິດວິດີໂອໃຫ້ກັບທາງໂຄງການພວກເຮົາ ເລື່ອງ “ຄິດໃຫ້ດີ ຊີວິດປອດໄພ ຫ່າງໄກຈາກ ໂຄວິດ-19” ແລະ ທາງທີມງານໂຄງການໄດ້ລາຍງານການຈັດຕັ້ງປະຕິບັດກິດຈະກຳໂຄງການຕັ້ງແຕ່ເລີ່ມຕົ້ນຈົນຮອດຈົບໂຄງການ ເຊິ່ງມີຜູ້ເຂົ້າຮ່ວມມາຈາກຫລາຍພາກສ່ວນເຊັ່ນ: ຕາງໜ້າຈາກກະຊວງແຮງງານ ແລະ ສະຫວັດດີການສັງຄົມ, ຕາງໜ້າຈາກພະແນກແຮງງານ ແລະ ສະຫວັດດີການສັງຄົມ ແຂວງຫລວງພະບາງ, ຕາງໜ້າຈາກພະແນກຖະແຫຼ່ງຂ່າວ,ວັດທະນະທຳ ແລະ ທ່ອງທ່ຽວ ແຂວງຫລວງພະບາງ, ວິທະຍາໄລກະສິກຳ ແລະ ປ່າໄມ້ພາກເໜືອ ແລະ ສະມາຄົມເພື່ອການສະໜັບສະໜູນ ແລະ ປັບປຸງຊົນນະບົດ. ທັງໝົດ 17 ທ່ານ (ຍິງ 7 ທ່ານ)

ກິດຈະກຳໃຫ້ຄວາມຮູ້ກ່ຽວກັບສາເຫດ ຜົນກະທົບ ແລະ ການປ້ອງກັນ ຂອງພະຍາດໂຄວິດ ແລະ ປະຊຸມປິດໂຄງການ

ຂໍ້ມູນຂອງຄົນທຸກຍາກ (ຜູ້ດ້ອຍໂອກາດ ແລະ ຜູ້ພິການ) ຂອງ 3 ເມືອງໄດ້ເກັບກຳ ແລະ ບັນທຶກໃສ່ຖານຂໍ້ມູນຂອງໂຄງການເມືອງ ປາກອູ ຈຳນວນ 111 ຄອບຄົວ, ເມືອງຈອມເພັດ 143 ຄອບຄົວ ແລະ ເມືອງຊຽງເງິນ 138 ຄອບຄົວ.
ຄອບຄົວທຸກຍາກ (ຄົນດ້ອຍໂອກາດ ແລະ ຄົນພິການ) ຈາກ 3 ເມືອງ 392 ຄອບຄົວໄດ້ຮັບເຄື່ອງໃຊ້, ເຄື່ອງອຸປະໂພກ-ບໍລິໂພກ , ອຸປະກອນປ້ອງກັນທີ່ຈໍາເປັນ, ເຮັດໃຫ້ຄອບຄົວຂອງເຂົາເຈົ້າຫຼຸດຜ່ອນຄວາມສ່ຽງຕໍ່ການຕິດເຊື້ອພະຍາດໂຄວິດ19 ແລະ ປອດໄພຫຼາຍຂຶ້ນ.
ສຳເລັດການສ້າງສື່ວີດີໂອສະບັບພາສາລາວທີ່ໃຫ້ຄວາມຮູ້ກ່ຽວກັບສາເຫດ, ຜົນກະທົບ, ການປ້ອງກັນ ແລະ ສິດທິກັບຜູ້ທີ່ຕິດເຊື້ອພະຍາດໂຄວິດ19 ໃຫ້ເຂົ້າເຖິງແຫຼ່ງຂໍ້ມູນທີ່ໜ້າເຊື່ອຖືໄດ້ຜ່ານສື່ອອນລາຍ, ວິທະຍຸກະຈ່າຍສຽງ ແລະ ໂທລະພາບ.
ໂຮງໝໍເມືອງຈອມເພັດ, ໜ່ວຍສະເພາະກິດເມືອງຈອມເພັດ, ໂຮງໝໍເມືອງປາກອູ, ໜ່ວຍສະເພາະກິດເມືອງປາກອູ, ໂຮງໝໍເມືອງຊຽງເງິນ ແລະ ໜ່ວຍສະເພາະກິດເມືອງຊຽງ ເພື່ອສະກັດກັ້ນ, ຄວບຄຸມ ແລະ ປ້ອງກັນພະຍາດ COVID-19 ເເລະ ເຮັດໃຫ້ເຂົາເຈົ້າປະຕິບັດໜ້າທີ່ຢ່າງເຕັມສ່ວນ ແລະປອດໄພຫຼາຍຂຶ້ນ.

ຜົນໄດ້ຮັບຂອງໂຄງການ

ໂຄງການສ້າງຄວາມອາດສາມາດໃຫ້ອົງການຈັດຕັັ້ງສັງຄົມ ແລະ ຊຸມຊົນເປົ້າໝາຍໃນການປະຕິບັດກົດໝາຍ, ການຄຸ້ມຄອງປ່າໄມ້ ແລະ ການຄ້າໄມ້ ໃນ ສປປ ລາວ

ແຂວງບໍ່ແກ້ວ, ແຂວງໄຊຍະບູລີ, ນະຄອນຫຼວງວຽງຈັນ ແລະ ແຂວງສະຫວັນນະເຂດ

ຂໍ້ມູນກ່ຽວກັບໂຄງການ

ໂຄງການສ້າງຄວາມອາດສາມາດໃຫ້ອົງການຈັດຕັັ້ງສັງຄົມ ແລະ ຊຸມຊົນເປົ້າໝາຍ ໃນການປະຕິບັດກົດໝາຍ, ຄຸ້ມຄອງປ່າໄມ້ ແລະ ການຄ້າໄມ້ ໃນ ສປປ ລາວ ແມ່ນໜຶ່ງໃນໂຄງການຂອງ ສະມາຄົມ ເພື່ອການສະໜັບສະໜູນ ແລະ ປັບປຸງຊົນນະບົດ (ສພປ), ທີ່ໄດ້ຈັດຕັ້ງປະຕິບັດຢູ່ 3 ແຂວງເປົ້າໝາຍຄື: ແຂວງ ບໍ່ແກ້ວ, ແຂວງ ໄຊຍະບູລີ ແລະ ແຂວງ ສະຫວັນນະເຂດ. ໂຄງການນີ້ໄດ້ຮັບທຶນຈາກ European Commission(EC), ມູນຄ່າ 200,000 EUR. ເຊິ່ງມີໄລຍະການຈັດຕັ້ງປະຕິບັດໂຄງການ 30 ເດືອນຄື ເດືອນ ກໍລະກົດ 2020 - ມັງກອນ 2023, ໂດຍຜູ້ຈັດຕັ້ງປະຕິບັດໂຄງການຫຼັກແມ່ນ ສະມາຄົມ ແມ່ຍິງຮ່ວມໃຈພັດທະນາ, ມີສະມາຄົມ ເພື່ອການສະໜັບສະໜູນ ແລະ ປັບປຸງຊົນນະບົດ ເປັນຄູ່ຮ່ວມສັນຍາ ແລະ ມີຄູ່ຮ່ວມງານປະຕິບັດໂຄງການ 2 ສະມາຄົມຄື: ສະມາຄົມອະນຸລັກສັດປ່າ ແລະ ສະມາຄົມສົ່ງເສີມຄວາມຮູ້ກ່ຽວກັບການຄົ້ນຄວ້າ ແລະ ພັດທະນາຊົນນະບົດ. ໂຄງການນີ້, ເປັນວຽກງານໜື່ງທີ່ສະໜັບສະໜູນ ແລະ ປະກອບສ່ວນໃນເປົ້າໝາຍການພັດທະນາແບບຍືນຍົງ ໃນ SDG7 ຄື: ຮັບປະກັນການເຂົ້າເຖິງພະລັງງານທີ່ທັນສະໄໝ, ຍືນຍົງ, ເຊື່ອຖືໄດ້ ແລະ ລາຄາບໍ່ແພງສຳລັບໝົດທຸກຄົນ; ໃນ SDG13 ຄື: ເອົາມາດຕະການອັນຮີບດ່ວນເພື່ອແກ້ໄຂບັນຫາການປ່ຽນແປງດິນຟ້າອາກາດ ແລະ ຮັບມືຜົນກະທົບຈາກບັນຫາດັ່ງກ່າວ ແລະ ໃນ SDG15 ຄື: ປົກປ້ອງ, ຟື້ນຟູ ແລະ ສົ່ງເສີມການນໍາໃຊ້ລະບົບນິເວດແບບຍືນຍົງ, ຄຸ້ມຄອງປ່າໄມ້ແບບຍືນຍົງ, ຕ້ານການກາຍເປັນທະເລຊາຍ, ຢຸດຕິ ແລະ ຟື້ນຟູການເສື່ອມໂຊມຂອງດິນ ແລະ ຢຸດການສູນເສຍຊິວະນາໆພັນ.

ພ້ອມກັນນີ້, ກໍ່ເປັນການປະກອບສ່ວນເຂົ້າໃນແຜນພັດທະນາເສດຖະກິດ - ສັງຄົມແຫ່ງຊາດ 5 ປີ ຄັັ້ງທີ IX ເຊິ່ງນອນຢູ່ໃນເປົ້າໝາຍທີ 4 ຄື: ປົກປັກຮັກສາສິ່ງແວດລ້ອມໃຫ້ມີຄວາມສົມດຸນ ແລະ ຫຼຸດຜ່ອນຄວາມສ່ຽງຈາກໄພພິບັດຕ່າງໆ. ໂດຍໄດ້ນອນຢູ່ໃນແຜນວຽກຈຸດສຸມທີ 1 ຄື: ການຄຸ້ມຄອງ ແລະ ນໍາໃຊ້ຊັບພະຍາກອນທຳມະຊາດໃຫ້ມີຄວາມຍືນຍົງ ແລະ ໃນແຜນວຽກຈຸດສຸມທີ 2 ຄື: ການເຕີບໂຕສີຂຽວ ແລະ ແກ້ໄຂບັນຫາຕໍ່ກັບການປ່ຽນແປງດິນຟ້າອາກາດ; ແຜນວຽກຈຸດສຸມທີ 3: ເພີ່ມທະວີການປ້ອງກັນ, ການຄວບຄຸມ ແລະ ການຟື້ນຟຸຫຼັງໄພພິບັດຕ່າງໆ.

ພາຍຫຼັງທີ່ພວກເຮົາໄດ້ລົງສຳຫຼວດຕົວຈິງກ່ອນການຈັດຕັ້ງປະຕິບັດໂຄງການ ເຫັນໄດ້ເຖິງຜົນກະທົບຕ່າງໆຈາກໄພທຳມະຊາດທີ່ເກີດຂື້ນໃນຊຸມຊົນ, ພວກເຮົາຈື່ງໄດ້ຫາທາງແກ້ໄຂຄວາມຂາດຕົກບົກພ່ອງ ແລະ ບັນດາຂໍ້ຈໍາກັດຂອງຊຸມຊົນ ໂດຍອີງໃສ່ຫຼັກການປົກປ້ອງສິດທິ ແລະ ການສ້າງຄວາມເຂັ້ມແຂງໃຫ້ກັບອົງການຈັດຕັ້ງຊຸມຊົນຈາກຊຸມຊົນເອງປະກອບດ້ວຍຫຼາຍຊົນເຜົ່າທີ່ມີຄວາມສ່ຽງ ໃຫ້ເຂົາເຈົ້າໄດ້ເຂົ້າເຖິງສິດທິພາຍໃຕ້ກົດໝາຍ, ສົ່ງເສີມຄວາມຮັບຜິດຊອບທາງສັງຄົມຂອງອໍານາດການປົກຄອງ ຕໍ່ກັບຊຸມຊົນເປົ້າໝາຍ, ສະໜັບສະໜູນການຕັດສິນໃຈແບບມີສ່ວນຮ່ວມຂອງຊຸມຊົນ ໂດຍສະເພາະແມ່ຍິງ. ຜູ້ໄດ້ຮັບຜົນປະໂຫຍດຫຼັກຄື ພະນັກງານຂອງ 4 ສະມາຄົມ, ຄະນະຄຸ້ມຄອງປ່າໄມ້ບ້ານ ແລະ ສະມາຊິກໃນ 7 ບ້ານຂອງ 3 ແຂວງ, ພະນັກງານລັດຈາກກະຊວງກະສິກຳ ແລະ ປ່າໄມ້ (MAF) ລວມທັງໝົດ 674 ຄົນ.

ໂຄງການສ້າງຄວາມອາດສາມາດໃຫ້ອົງການຈັດຕັັ້ງສັງຄົມ ແລະ ຊຸມຊົນເປົ້າໝາຍ ໃນການປະຕິບັດກົດໝາຍ, ຄຸ້ມຄອງປ່າໄມ້ ແລະ ການຄ້າໄມ້ ໃນ ສປປ ລາວ ມີ 2 ກິດຈະກຳຫຼັກ ແລະ 8 ກິດຈະກຳຍ່ອຍ

1 ຝຶກອົບຮົມໃຫ້ແກ່ບັນດາອົງການຈັດຕັ້ງທາງສັງຄົມລາວໃນດ້ານການສະໜັບສະໜູນ ສົ່ງເສີມ ແລະ ການເຈລະຈາຕໍ່ລອງທີ່ມີປະສິດທິຜົນ

ປະເມີນການສ້າງຄວາມສາມາດໃຫ້ 3 ອົງກອນຄູ່ຮ່ວມງານແບບມີສ່ວນຮ່ວມ.
ຝຶກອົບຮົມການສ້າງຄວາມອາດສາມາດໃຫ້ອົງກອນ
ຝຶກອົບຮົມກ່ຽວກັບລະບຽບການເງິນ ແລະ ການບໍລິຫານທຶນຂອງ EU.
ຝຶກອົບຮົມການນໍາໃຊ້ສື່ ແລະ ສັນຍາລັກ (Logo) ສໍາລັບໂຄງການທີ່ໄດ້ຮັບທຶນຈາກ EU.
ກວດສອບລາຍງານ ແລະ ການນຳໃຊ້ທຶນ ຂອງໂຄງການ EU
ຝຶກອົບຮົມການນໍາໃຊ້ຖານຂໍ້ມູນດ້ານການຕິດຕາມ-ກວດກາ ແລະ ຄຸ້ມຄອງປ່າໄມ້.

2 ຜະລິດອຸປະກອນໂຄສະນາ ແລະ ສື່ສິ່ງພິມ, ຄຸ້ມຄອງ ແລະ ບໍລິຫານເວັບໄຊ ແລະ ສື່ສັງຄົມອອນລາຍເພື່ອໂຄສະນາ-ເຜີຍແຜ່ວຽກງານຂອງໂຄງການ.

ອອກແບບບັນດາເອກະສານທີ່ນໍາໃຊ້ລັບກອງປະຊຸມ, ໃຊ້ນໍາລັບເຜີຍແຜ່ ແລະ ໂຄສະນາ.
ອອກແບບສື່ສິ່ງພິມ, ສື່ໂຄສະນາ ແລະ ປ້າຍໂຄງການ.
ຖ່າຍທໍາ ແລະ ຜະລິດວິດີໂອການປ່ຽນແປງຂອງໂຄງການ, ອອກແບບ ແລະ ຕັດພິມບົດກໍລະນີສຶກສາ ເພື່ອການໂຄສະນາ ແລະ ເຜີຍແຜ່.

ສ້າງຄວາມສາມາດໃຫ້ອົງການຈັດຕັ້ງສັງຄົມລາວໃນການເປັນຜູ້ອຳນວຍຄວາມສະດວກ ແລະ ຜູ້ສະໜັບສະໜູນຊຸມຊົນເປົ້າໝາຍຢ່າງມີປະສິດທິພາບ

ເນື່ອງຈາກໂຄງການນີ້ມີຫຼາຍພາກສ່ວນທີ່ໄດ້ເຮັດວຽກຮ່ວມກັນ, ຈື່ງຕ້ອງການຄວາມເປັນອັນໜື່ງອັນດຽວ ແລະ ເປັນເອກະພາບກັນໃນທຸກໆເລື່ອງ. ດັ່ງນັ້ນ, ພວກເຮົາທີມງານຈາກສະມາຄົມ ເພື່ອການສະໜັບສະໜູນ ແລະ ປັບປຸງຊົນນະບົດ ຈື່ງໄດ້ຮັບຜິດຊອບໜ້າທີ່ໃນການສ້າງຄວາມອາດສາມາດ ແລະ ສ້າງຄວາມເຂັ້ມແຂງໃຫ້ກັບຄູ່ຮ່ວມງານ ເພື່ອທີ່ເຂົາເຈົ້າຈະສາມາດກາຍໄປເປັນຄູຝຶກ ແລະ ເປັນຜູ້ອຳນວຍຄວາມສະດວກທີ່ດີ ສາມາດສົ່ງຕໍ່ໃຫ້ຊຸມຊົນໄດ້ຢ່າງມີປະສິດທິພາບ ແລະ ມີປະສິດທິຜົນ.

ປະເມີນການສ້າງຄວາມສາມາດໃຫ້ 3 ອົງກອນຄູ່ຮ່ວມງານແບບມີສ່ວນຮ່ວມ

ເນື່ອງຈາກວ່າຄູ່ຮ່ວມງານທັງ 3 ອົງກອນ ຢູ່ຕ່າງພື້ນທີ່ກັນ, ພວກເຮົາກໍ່ເລີຍໄດ້ຈັດກິດຈະກຳປະເມີນຄວາມອາດສາມາດໂດຍນຳໃຊ້ແບບຟອມ KOBO online ຂື້ນ 3 ຄັ້ງຄື: ຄັ້ງທີ1 ທີ່ຫ້ອງການສະມາຄົມ ສົ່ງເສີມການຄົ້ນຄວ້າ ແລະ ພັດທະນາຊົນນະບົດ. ຄັ້ງທີ2 ຜ່ານລະບົບ ZOOM Online ໃຫ້ສະມາຄົມ ແມ່ຍິງຮ່ວມໃຈພັດທະນາ ທີ່ແຂວງ ບໍ່ແກ້ວ ແລະ ຄັ້ງທີ3 ຜ່ານລະບົບ ZOOM Online ໃຫ້ສະມາຄົມ ອະນຸລັກສັດປ່າ ທີ່ແຂວງ ຄຳມ່ວນ. ເພື່ອເປັນການປະເມີນກ່ຽວກັບພາບລວມໃນການເຮັດວຽກຂອງແຕ່ລະສະມາຄົມທີ່ຜ່ານມາ ວ່າເຂົາເຈົ້າມີຈຸດດີ-ຈຸດທີ່ຕ້ອງການປັບປຸງແນວໃດ.

ຝຶກອົບຮົມສ້າງຄວາມອາດສາມາດໃຫ້ອົງກອນ

ກິດຈະກຳການຝຶກອົບຮົມຮູບແບບອົງກອນທີ່ມີປະສິດທິພາບໃຫ້ກັບອົງກອນຄູ່ຮ່ວມງານ ແມ່ນໄດ້ສືບຕໍ່ຈາກກິດຈະກຳປະເມີນຄວາມອາດສາມາດຂອງອົງກອນ ເພາະວ່າຫຼັງຈາກທີ່ພວກເຮົາໄດ້ຮູ້ວ່າແຕ່ລະອົງກອນມີຈຸດດີ ແລະ ຈຸດທີ່ຕ້ອງການປັບປຸງທາງດ້ານໃດແລ້ວ. ພວກເຮົາກໍໄດ້ຈັດຝຶກອົບຮົມນີ້ຂື້ນ, ເພື່ອເປັນການຈັດຕັ້ງປະຕິບັດແຜນພັດທະນາຄວາມສາມາດຂອງແຕ່ລະອົງກອນ. ເຊິ່ງແຕ່ລະອົງກອນໄດ້ມີການຈັດບຸລິມະສິດຂອງແຕ່ລະໜ້າວຽກວ່າໂຕໃດທີ່ຕ້ອງການປັບປຸງກ່ອນ ຫຼື ຫຼັງ, ພ້ອມກັນນີ້ ກໍໄດ້ມີການແລກປ່ຽນຄວາມຮູ້ຄວາມສາມາດລະຫວ່າງອົງກອນ ແລະ ໄດ້ມີການຮຽນຮູ້ທັກສະດ້ານການຄຸ້ມຄອງ-ບໍລິຫານຈາກພວກເຮົາອີກດ້ວຍ.

ຫົວຂໍ້: ຮູບແບບອົງກອນທີ່ມີປະສິດທິຜົນ ໃນວັນທີ 03-05 ກຸມພາ 2021 ທີ່ສູນສະເຕ່ວລາ, ນະຄອນຫຼວງວຽງຈັນ. ມີຜູ້ເຂົ້າຮ່ວມ15 ທ່ານ (ຍິງ 7 ທ່ານ). ຈຸດປະສົງ ເພື່ອຈັດຕັ້ງປະຕິບັດແຜນພັດທະນາຄວາມສາມາດຂອງ 3 ອົງກອນຄູ່ຮ່ວມງານຕາມຜົນປະເມີນ ແລະ ແລກປ່ຽນກ່ຽວກັບການວາງແຜນພັດທະນາອົງກອນ.

ຝຶກອົບຮົມກ່ຽວກັບລະບຽບການເງິນ ແລະ ການບໍລິຫານທຶນຂອງ EU

ຝຶກອົບຮົມກ່ຽວກັບລະບຽບການເງິນແລະ ການບໍລິຫານທຶນຂອງ EU. ທີ່ໂຮງແຮມ Grand Hotel Vientiane, ນະຄອນຫຼວງວຽງຈັນ ໃນວັນທີ 22 ກໍລະກົດ 2021, ມີຜູ້ເຂົ້າຮ່ວມ 15 ທ່ານ (ຍິງ 4 ທ່ານ).ເພື່ອຜ່ານກົດລະບຽບດ້ານການສື່ສານ, ການນຳໃຊ້ສື່ິ່ງພິມ, ສື່ອອນລາຍ, ສື່ວີດີໂອ, ສຽງ ແລະ ສັນຍາລັກ EU ໃນກິດຈະກຳຂອງໂຄງການ ແລະ ໃນບົດລາຍງານປະຈຳປີ. ພ້ອມປຶກສາຫາລື ແລະ ວາງແຜນການຜະລິດອຸປະກອນໂຄສະນາ, ແຜ່ນພັບ, ປ້າຍໂຄງການ, ເສື່ອ, ບົດກໍລະນີສຶກສາ ແລະ ອື່ນໆຂອງໂຄງການໃນໄລຍະ 18 ເດືອນຂ້າງໜ້າ ແລະ ເພື່ອສ້າງການມີສ່ວນຮ່ວມຂອງຄູ່ຮ່ວມງານດ້ານການໂຄສະນາ, ເຜີຍແຜ່ກິດຈະກຳ, ຜົນສຳເລັດ, ການປ່ຽນແປງໃຫ້ສາມາດຮັບຮູ້ໄດ້ຢ່າງກວ້າງຂວາງ ແລະ ມີປະສິດທິຜົນ.

ຝຶກອົບຮົມການນໍາໃຊ້ສື່ ແລະ ສັນຍາລັກ (Logo) ສໍາລັບໂຄງການທີ່ໄດ້ຮັບທຶນຈາກ EU

ຝຶກອົບຮົມການຄຸ້ມຄອງ ແລະ ບໍລິຫານການເງິນ ຈັດຂື້ນໃນວັນທີ 23 ກໍລະກົດ 2021, ທີ່ນະຄອນຫຼວງວຽງຈັນ. ຜູ້ເຂົ້າຮ່ວມຈາກ 3 ອົງກອນຄູ່ຮ່ວມງານທັງໝົດ 15 ທ່ານ (ຍິງ 4 ທ່ານ). ຈຸດປະສົງກໍ່ເພື່ອຂຽນບົດລາຍງານປະຈຳປີໃຫ້ກັບໂຄງການ ດ້ວຍການຮວບຮວມບັນດາບົດລາຍງານພາກກິດຈະກຳຂອງແຕ່ລະຄູ່ຮ່ວມງານ, ສັງລວມບົດລາຍງານພາກການເງິນ ແລະ ບັນດາເອກະສານລາຍຈ່າຍທັງໝົດ ແລະ ຢ້ງຢືນໃຫ້ຜູ້ໃຫ້ທຶນ ຫຼື ຫ້ອງການ EU. ແລະ ຮ່ວມກັນວາງແຜນກີດຈະກຳຂອງປີທີ 2 ແລະ ກະກຽມການຂໍນຳໃຊ້ງົບປະມານ ເດືອນທີ 13 ຫາ ເດືອນທີ 24.

ຜະລິດອຸປະກອນໂຄສະນາ ແລະ ສື່ສິ່ງພິມ, ຄຸ້ມຄອງ ແລະ ບໍລິຫານເວັບໄຊ-ສື່ສັງຄົມອອນລາຍເພື່ອໂຄສະນາ ເຜີຍແຜ່ວຽກງານຂອງໂຄງການ

ເພື່ອເປັນການສະໜັບສະໜູນໂຄງການໃຫ້ມີຜົນງານທີ່ເປັນຮູບປະທຳ ແລະ ມີບ່ອນອີງໃນເວລາທີ່ໄດ້ສຳເລັດການຈັດຕັ້ງປະຕິບັດກິດຈະກຳຕ່າງໆ, ພວກເຮົາໃນນາມທີມງານສ້າງຄວາມອາດສາມາດໃຫ້ໂຄງການກໍໄດ້ມີການວາງແຜນ ແລະ ກຽມພ້ອມສຳລັບການຜະລິດສື່ອຸປະກອນຕ່າງໆ ທີ່ຈະຕອບສະໜອງໃຫ້ກັບແຕ່ລະກິດຈະກຳ, ບໍ່ພຽງແຕ່ເພື່ອເປັນສື່ໂຄສະນາເທົ່ານັ້ນ ແຕ່ມັນຍັງເປັນບ່ອນບັນທຶກຂໍ້ມູນ, ບັນທຶກຄວາມຮູ້ຕ່າງໆແລ້ວ ມັນຍັງສາມາດເປັນເອກະສານຢັ້ງຢືນປະກອບໃສ່ໃນບົດລາຍງານແກ່ຜູ້ທີ່ສະໜັບສະໜູນທຶນໄດ້ເຫັນອີກດ້ວຍ ກ່ຽວກັບທຸກໆວຽກງານ ບໍ່ວ່າຈະເປັນຄວາມຮູ້ໃໝ່ ຫຼື ປະສົບການທີ່ໄດ້ຮຽນຮູ້ນຳກັນລະຫວ່າງພາກລັດ, ອົງການຈັດຕັ້ງສັງຄົມ ແລະ ຊຸມຊົນເປົ້າໝາຍ.

ບັນດາຜົນຮັບຂອງກິດຈະກຳ ແລະ ບົດຮຽນທີ່ດີໄດ້ຖືກສົ່ງຕໍ່

ພວກເຮົາໄດ້ແບ່ງປັນຄວາມຮູ້ ແລະ ບັນດາຜົນຮັບຕ່າງໆຂອງແຕ່ລະກິດຈະກຳຜ່ານຫຼາຍໆຊ່ອງທາງ ໂດຍສະເພາະແມ່ນທາງ Facebook ພວກເຮົາກໍ່ໄດ້ອັບເດດຜົນຮັບລົງເລື້ອຍໆຜ່ານເພສ Lao CSO FLEGT ໂດຍກໍານົດເອົາຢ່າງໜ້ອຍ 1 ເດືອນຕ້ອງມີ 2 ໂພສ. ຄຽງຄູ່ກັນນີ້, ບັນດາຄວາມຮູ້ ແລະ ຜົນຮັບຂອງກິດຈະກໍາຕ່າງໆເຫຼົ່ານັ້ນກໍ່ໄດ້ຖືກສົ່ງຕໍ່ຈາກຄູ່ຮ່ວມງານ, ຜູ້ທີ່ມີຄວາມສົນໃຈອອກສູ່ສັງຄົມອີກດ້ວຍ.

ໃນວຽກງານການຜະລິດອຸປະກອນ ແລະ ສື່ໂຄສະນາສຳລັບໂຄງການ, ພວກເຮົາກໍ່ໄດ້ມີການກະກຽມ ຜະລິດເສື້ອຍືດໂຄງການ, ຜະລິດປ້າຍໂຄງການປະຈຳແຕ່ລະພື້ນທີ່ 3 ແຂວງ, ຜະລິດເວບໄຊ, ຜະລິດວີດີໂອ, ກະກຽມອອກແບບປື້ມບົດກໍລະນີສຶກສາ ເຊິ່ງແຕ່ລະກິດຈະກຳແມ່ນຈະໄດ້ເລີ່ມໃນຕົ້ນປີ 2022.

ຜົນໄດ້ຮັບຂອງໂຄງການ

ອົງການປ່າໄມ້ຊຸມຊົນ ແລະ ອົງການຈັດຕັ້ງທາງສັງຄົມໃນລະດັບເມືອງ, ແຂວງ ແລະ ລະດັບຊາດ ໄດ້ມີການປຶກສາຫາລືແລກປ່ຽນ ເອກສານຄວາມຮູ້ ແລະ ປະສົບການຮ່ວມກັນ

ຄູ່ຮ່ວມງານມີຄວາມເຂັ້ມແຂງທາງດ້ານການບໍລິຫານຈັດການ, ສາມາດເປັນຜູ້ອໍານວຍຄວາມສະດວກແບບມີປະສິດທິຜົນແລະ ສະໜັບສະໜູນສົ່ງເສີມຊ່ວຍເຫຼືອໃຫ້ແກ່ຊຸມຊົນຜູ້ອາໄສປ່າໄມ້ໄດ້

ເຈົ້າໜ້າທີ່ລັດຖະບານມີຄວາມຮັບຜິດຊອບແລະ ເຄົາລົບສິດຂອງກຸ່ມຜູ້ຊົມໃຊ້ປ່າໄມ້ຫຼາຍຂື້ນ

ປະຊາຊົນທີ່ອາໄສໃນຊຸມຊົນແລະ ຜູ້ນໍາໃຊ້ປ່າໄມ້ ມີຄວາມຮູ້ໃນການສ້າງແຜນການຈັດຕັ້ງປະຕິບັດ ແລະ ການຕິດຕາມກວດກາຄຸ້ມຄອງປ່າໄມ້ແບບມີສວ່ນຮ່ວມຢ່າງໂປ່ງໃສ ແລະ ເປັນທີ່ຍອມຮັບຂອງອໍານາດການປົກຄອງທ້ອງຖິ່ນ